İran rəhbərliyi ölkədə hakim olan müsəlman geyim qaydalarına uyğun geyinməyən qadınlara qarşı yeni təzyiq dalğasına başlayıb.
Polis saçlarını örtməyən və bədənin quruluşunu göstərən sıx paltarlar geyən qadınlara qarşı 1300-ə qədər xəbərdarlıq edildiyini deyib. Bu qadınlardan 59-nun işi məhkəməyə göndərilib.
İran rəhbərliyi belə aksiyaları ara-sıra xüsusilə də yay vaxtı, adamların daha nazik paltarlar geydiyi vaxt həyata keçirir.
1997-ci ildə Məhəmməd Xatəmi prezident olduqdan sonra bu cür qaydaların qüvvəsi zəifləmişdi. Lakin sərt xətt tərəfdarları və mühafizəkar ruhanilər indiki prezident Mahmud Əhmədinejadı İslam qanunlarını yenidən qüvvəyə mindirməyə çağırmışdı.