ABŞ
mətbuatının bildirdiyinə görə, İsrail böyük hərbi təlimlər keçirir. Amerika
rəsmiləri isə bunun İranın nüvə vasitələrinə potensial hücum üçün təcrübə
olduğunu deyir. Nyu-York Taymsda nəşr olunan məqalədə deyilir ki, bu ayın
əvvəlində 100-dən çox qırıcı təyyarə hərbi manevrləri məşq ediblər.
Vertolyotlar və yanacaq doldurma tankerləri də təxminən İsraildən İranın uran
zənginləşdirmə vasitələrinin yerləşdiyi Natanza qədər olan 1400 kilometr
məsafədə keçirilən uçuşda iştirak edib. Adı açıqlanmayan ABŞ hərbi rəsmisinə
istinad edən yazıda bildirilir ki, İsrail Tehranın nüvə fəaliyyətini
dayandırması üçün beynəlxalq səylər boşa çıxdığı təqdirdə lazımı tədbirlər
görməyə hazırlaşdığını nümayiş etdirir.