"Prezident Buş məni Azərbaycan xalqına və bütün
regiona aydın ismarıcla göndərib: Amerikanın sizin rifahınız və
təhlükəsizliyinizin təmin olunmasında dərin və möhkəm maraqları var".
ABŞ-ın vitse-prezidenti Dik Çeyni sentyabrın 3-də
Bakıda Azərbaycan prezidenti İlham Əliyevlə danışqlarından sonra belə deyib.
Ağ Evin bildirdiyinə görə, vitse-prezident
qeyd edib ki, dünyada sülh və təhlükəsizliyin əsasında milli sərhədlərə hörmət
prinsipi dayanır, indi həmin prinsip təhlükə altındadır.
"Demək
olar ki 20 ildir biz sizin xalqınıza öz müstəqilliyini, suverenliyini qurmaq və
möhkəmləndirmək, beynəlxalq birliyə onun dəyərli və sayılan üzvü kimi
inteqrasiya olmaq işində dəstək vermişik. Bu gün biz həmin öhdəliklərimizi və
təkcə bu gün üçün deyil uzun müddət ərzində ölkələrimiz arasında əlaqələrin
möhkəmlənməsi barədə qətiyyətimizi bir
daha bəyan edirik".
Çeyni
deyib ki, onun Azərbaycana səfəri aylar
əvvəl planlaşdırırdı. Buna baxmayaraq
o, İlham Əliyevlə ilə bu yaxınlarda Rusiyanın Gürcüstana müdaxiləsini
müzakirə edib.
"Bizim bugünkü görüşümüz Rusiyanın bu yaxınlarda
Gürcüstana etdiyi hərbi müdaxilə fonunda baş tutub. ABŞ Qafqaz bölgəsindəki
müttəfiqlərinin əmin-amanlığında və rifahında dərindən maraqlıdır",- deyə vitse-prezident vurğulayıb.
Çeyni əlavə edib ki, Amerika ilə Azərbaycan dünyanın bu vacib regionunda sabitlik və
təhlükəsizlik axtarışında ortaq maraqları bölüşürlər.
Vitse-prezidentin
sözlərinə görə, ABŞ enerji resurslarının ixracı üçün əlavə marşrutların olması
istiqamətində Azərbacanla əməkdaşlıq etməkdə maraqlıdır: «ABŞ əmindir ki, biz
Avropa ölkələri və Türkiyə, eləcə də Qafqaz və Mərkəzi Asiya dövlətləri ilə
birlikdə işləməliyik ki, enerji resurslarının ixracı üçün əlavə marşrutlar
olsun və onlar sərbəst şəkildə nəql edilsin».
Qarabağ
münaqişəsinə toxunan Çeyni deyib ki, Amerika
problemin danışıqlar yolu ilə, ərazi bütövlüyü və digər beynəlxalq
prinsiplərə cavab verən sülh əsasında həllini istəyir:
"Amerika Azərbaycanın ərazi bütövlüyünü və suverenliyini tam
dəstəkləyir. Qarabağ probleminin danışıqlar yolu ilə və Azərbaycanın ərazi
bütövlüyü prinsipi əsasında həllini istəyir. Bu problemin həlli Azərbaycanın
təhlükəsizliyi və sabitliyi üçün çox vacibdir. Biz həmçinin Azərbaycanın Qərblə
enerji sahəsində bazar iqtisadiyyatı prinsipləri əsasında və aşkarlıq
şəraitində əməkdaşlığını yüksək qiymətləndiririk".
Dik Çeyni həmçinin əlavə edib ki, Amerika
Azərbaycan xalqının çox vaxt, böyük çağırışlar qarşısında qalan demokratiya,
qanunun aliliyi və insan haqlarına əməl olunması uğrunda cəhdlərini
dəstəkləyir.
Öz
növbəsində, Azərbaycan prezidenti İlham Əliyev bildirib ki, o, vitse-prezident
Çeyni ilə enerji əməkdaşlığının gələcək inkişafını və enerji təchizatının
müxtəlifləşməsini müzakirə edib. Əliyev deyib ki, bu məsələ təkcə enerji
istehlakçıları üçün vacib deyil, həm də istehsalçı kimi, Azərbaycan üçün də
vacibdir.
Əliyev
deyib ki, Amerika ATƏT-in Minsk Qrupunun həmsədri kimi, Azərbaycanla
Ermənistana münaqişənin həllini tapmaqda kömək etməklə nizamlama prosesində
vacib rol oynayır: "Lakin əlbəttə bütün digər münaqişələr kimi, bu problemin həlli
də beynəlxalq hüququn baza prinsiplərinə cavab verməlidir. Azərbaycanın ərazi
bütövlüyü təmin edilməlidir".
Azərbaycan
prezidenti Amerikanın vitse-prezidenti ilə regional inkişaf məsələlərini də
yaxından müzakirə etdiklərini vurğulayıb.