İranın 31 Universitet tələbə birlikləri İran
hakimiyyətinin Azərbaycanlılara qarşı siyasətini pisləyərək özəlliklə Təbriz
Universitetinin milli fəallarının həbs edilərək işgəncə və təzyiqlərə məruz
qoyulmalarına qarşı bəyanat yayıblar.
Bəyanatda bildirilir ki, İran hakimiyyəti universitetlərin yay tətilindən
istifadə edərək Universitet daxilindəki sinfi və milli haqlarını müdafiə edən
tələbələri təhsildən məhrum və əksər hallarda həbs edərək işgəncə və təzyiqlərə
məruz qoymağa başlayıb. Bəyanatda bu da
deyilir ki, keçən təhsil ilində Təbriz
universitetindən Nadir Mehdi Qarabağ, Nahid Babazadə, Əmin İmani və Səməd
Paşayinin diplom işlərini müdafiələrinin qarşısı alınaraq onlar təhsildən
məhrum edilib. Sənəddə ayrıca deyilir
ki, Səccad Radmehri və onunla yanaşı çoxlu sayda tələbəni Azərbaycanda və
İranın başqa şəhərlərində həbs və təhdidlərlə öz mövqelərini dəyişməyə cəhd
ediblər.
Tələbə Birliklərinin bəyanatında qeyd olunur ki, Iran təhlükəsizlik
məmurlarının özbaşınalığı nəticəsində Səccad Radmehr, Fəraz Zehtab, Aydın
Xaceyi, Əmir Mərdani, Mənsur Əminyan və Məqsud Əhdi həbs edilərək ağır işgəncə
və təzyiqlərə məruz qalmaqdadırlar.
Sənədin müəllifləri yazırlar ki, onlar
İranın bütün universitetlərinin tələbə dərnəklərinin və tələbə
hərəkatının üzvləri olaraq həbs edilən günahsız tələbələrin dərhal azadlığını
və toxunulmazlığını tələb edirlər.