Avropa Şurası Parlament Assambleyasi Kipr
adasındakı türklərə təcriddən çıxmaq imkanı verib. Türkiyənin rəsmi "Anadolu" agentliyinin xəbərinə
görə, Assambleyanın bu gün qəbul etdiyi qətnamədə Kipr
yunanlarına xəbərdarlıq edilib ki, türklərin dəniz limanlarından Avropa
ölkələri ilə birbaşa ticarətinə, habelə beynəlxalq səviyyədə humanitar
əlaqələrinə maneələr törədilməsinə son qoyulsun. Avropa Birliyinin üzvü olan
Yunan Kipri daha əvvəl Azərbaycan da
daxil olmaqla bir sıra ölkələrin Kipr türkləri ilə təmaslarına qarşı
çıxmışdı. "Amerikanın səsi"nə müsahibə
verən, Kipr türklərinin xarici işlər
naziri Turqay Avçı Azərbaycandan və bütün dost ölkələrdən dəstək istəyib.
"Avropa Birliyi və dünya ölkələri bir məsələni başa düşməIi və
qəbul etməlidirlər ki, Kipr türklərinin qarşısındakı cığırlar baglanmamalıdır.
Kipr türkləri
də bu dünyanın insanlarıdır. Dünyadakı bütün ölkələrin nəqliyyat, ticarət,
təhsil haqları varkən Kipr türklərinin sadəcə Kipr türkü olduqları üçün bu
haqlardan məhrum edilməsı qəbul olunan deyil. Buradan hamıya səslənirik, bütün
dost və qardaş ölkələrdən dəstəklərini gözləyirik", - deyə Turqay Avçı
vurgulayıb.
Kipr türklərinin xarici işlər naziri
bildirib ki, beynəlxalq təcrid və adadakı yunan dövlətinin təzyiqləri üzündən illərdir ki, Azərbaycanla
əlaqə qura bilmirlər. Bir neçə il bundan əvvəl Lefkoşadan Bakıya birbaşa
təyyarə uçuşuna başlasalar da, bu davam edə bilmədi:
"Təəssüf ki, Avropa Birliyinin Azərbaycan
üzərində təzyiqləri olmuşdu. Biz qardaş ölkə Azərbaycanla ticarət, mədəni və
təhsil əlaqələrimizi inkişaf etdirmək üçün davamlı olaraq təmaslar qururuq.
Əlaqələri daha da irəli aparmaq üçün əlimizdən gələn hər şeyə hazırıq".
Turqay Avçı deyir ki, türk əhalisi bu
günədək Kipr probleminin qurbanı olsa da, problemi həll etmək üçün qisas
hissinin əsiri olmadan müəyyən addımlar atılıb.
"Amerikanın səsi"nə müsahibəsində Kipr türklərinin xarici işlər
naziri adanın birləşməsi istiqamətində son təmaslardan da danışıb. O deyib ki,
sentyabrın 3-dən başlayan danışıqlar yunan Kipri üçün son şansdır. Belə ki,
Kipr türkləri daha 40 il gözləyə bilməz.
Turqay Avçı diqqəti ona
yönəldir ki, indi dünya birliyi bir neçə məsələyə yenidən baxmalıdır. Belə ki,
dəyişən dünya düzənində Kipr türklərinə verilən vədlər yerinə yetirilmir. Kipr
türklərinin xarici işlər naziri BMT, Avropa Birliyi, Rusiya və yunan
Kiprinin ünvanına mesajlar
göndərib. Onun sözlərinə görə,
Kosovonun ardından, Gürcüstanda baş verən hadisələr beynəlxalq birliyin
münaqişələrə etinasız münasibətinin nə qədər zərərli olduğunu sübut edir.