“İki
gün sonra keçiriləcək prezident seçkiləri Azərbaycanın demokratik inkişafı üçün
vacib mərhələdir. Amma bu, ölkənin xarici siyasəti qarşısında heç bir yeni
çağırışlar qoymur”. Bunu Azərbaycanın
Los-Ancelesdəki baş konsulu Elin Süleymanov deyib.
“Amerikanın səsi”nə
müsahibəsində diplomat ölkədəki prezident seçkiləri, regional gərginlik və
bunların Amerika-Azərbaycan münasibətlərinə təsirləri barədə danışıb.
Cənab
Süleymanov bildirib ki, seçkilər Azərbaycanın özü üçün vacibdir. Belə ki, bu, ölkəyə özünün inkişafı və təsdiqi işində imkanlar verir. Eyni zamanda, ölkənin beynəlxalq nüfuzu baxımından: “Sözsüz ki, nə
qədər Azərbaycan demokratik olsa, Amerika ilə bir yerdə imkanlarımız daha da
yüksələcək və əlaqələr daha da yaxşı olacaq”. Diplomat diqqəti ona yönəldib ki,
seçkilər regionda gərginliyin artdığı bir dövrdə keçirilir. Onun sözlərinə
görə, Azərbaycan diplomatiyası xüsusilə son aylar regional qarşıdurmanın
fonunda öz praqmatik və balanslı kursunu qoruya bilib, belə ki, indi ölkədə
sabitlik var: “Ancaq sözsüz ki, regionda gərginlik yüksəlib və vəziyyət daha da
gərginləşib. Biz də bu məsələni düşünməliyik”.
Cənab Süleymanov daha sonra vurğulayıb
ki, Qafqazda beynəlxalq rəqabətin artmasına baxmayaraq, Azərbaycan heç bir
tərəfə meyllənməyəcək, öz milli maraqlarını üstün tutacaq:
“Azərbaycan Vaşinqtondakı ekspertlərin
sözü ilə hərəkət etməyəcək. Biz seçim etmək istəmirik. İran bizim qonşumuzdur,
Rusiya qonşumuzdur. Amerika tərəfdaşımızdır. Bir yerdə işləyəcəyik. Biz gördük
ki, seçimləri edəndə bunun nəticəsi nə olur. Ermənistan seçimini edib və indi
də özünü izolyasiya gününə salıb. Biz görürük ki, Gürcüstan da öz seçimini edib
və onun da nəticəsi nə oldu. Azərbaycan xalqının təhlükəsizliyi və Azərbaycan
dövlətinin sabitliyi bizim ən böyük məqsədimizdir və ona nail olacağıq”.
Azərbaycanın
Los-Ancelesdəki baş konsulu diqqəti habelə ona yönəldib ki, beynəlxalq
təhlükəsizlik və enerji siyasətində Bakı həmişə Vaşinqtonla bir yerdədir. Onun sözlərinə görə, bu siyasət davam edəcək.
Bununla yanası, Azərbaycan ümid edir ki, Nabukko və bu kimi konkret layihələrdə
ölkənin digər tərəfdaşları da Amerika qədər fəal səylər göstərəcəklər.