Avropa Surası Parlament Assambleyasının Azərbaycanda seçkiləri müşahidə
missiyasının rəhbəri Andres Herkel seçkiyə bir gün qalmış "Amerikanın səsi"nə
müsahibə verib.
Cənab Herkel hazırda Bakıdadır və bu gün ərzində prezidentliyə
namizədlər, eləcə də seçki qurumlarının rəhbərləri və digər şəxslərlə görüşüb.
Onunla günün sonunda "Amerikanın səsi"nin əməkdaşı Ələkbər Raufoğlu telefonla
əlaqə saxlayıb.
Andres Herkel
deyib ki, seçkiyə bir gün qalmış ölkədəki siyasi vəziyyət qeyri-ənənəvidir.
Bunula yanaşı, müşahidəçinin fikrincə, pozitiv iradə olarsa, demokratik seçki
keçirilə bilər:
"Mən seçkinin
müsbət keçəcəyini mümkün sayıram, hər halda, bəzi pozitiv məqamlarla
rastlaşmışam. Əlbəttə, nöqsanlara da rast gəlmək olur, amma bu gün bunlardan
danışmaq düzgün deyil. Mən ölkəsinin gələcəyini düşünən hər bir Azərbaycanlının
seçkilərə qoşulub iradəsini ifadə edəcəyinə inanıram. Konkret olaraq seçki
mühiti barədə indidən danışmaq çətindir. Sadəcə seçkiyə bir gün qalır".
Cənab Herkelə
görə, qanunvericilik baxımından seçki ərəfəsində atılmış addımlar deməyə əsas
verir ki, ölkədə sərbəst və demokratik səsvermə keçirmək mümkündür. Belə ki,
bir müddət əvvəl Azərbaycan parlamenti
seçkilərin hüquqi bazasını hazırlamaq üçün lazımi texniki düzəlişlər
həyata keçirib.
Bu fakt
beynəlxalq müşahidəçilərdə belə təsəvvür yaradıb ki, ədalətli və demokratik
seçkilərin keçirilməsi üçün irəliləyişlər qeydə alınıb. Amma verilən
tövsiyələrin heç də hər birinin tam şəkildə həyata keçirilmədiyi də missiya
rəhbərini narahat edir.
Cənab Herkel
eyni zamanda, seçkidə iştirak etməyən partiyalar da daxil olmaqla bütün siyasi
qüvvələri seçki günü və ondan sonra məsuliyyətlərini dərk etməyə çağırır.
Belə ki, onun fikrincə, seçkiqabağı atmosferin kifayət
qədər rəqabətsiz olması adi vətəndaşların bu prosesdən – səsvermə hüququndan
uzaq düşməsinə səbəb olmamalıdır. Missiya rəhbəri deyir ki, müxalifət
partiyalarının seçkilərdə iştirak etməməsi onları öz hüquqlarını da müdafiə etməkdən məhrum edib: "Biz
sentyabr ayında bir neçə beynəlxalq təşkilatla birlikdə bəyanat vermişdik. Mən
deməliyəm ki, seçkinin daha ideal vəziyyətdə keçməsi üçün etdiyimiz çağırışlara
bəzən siyasi qüvvələrin heç biri əhəmiyyət vermirdi. Amma ümumilikdə təşviqat
kampaniyasında və qüvvələr nisbətində kəskin problem görmürəm. Prezidentliyə
namizədlər seçki keçirmək üçün daha yaxşı hazırlaşıblar. Düzdür, sabah seçkinin
necə keçəcəyi barədə hələ heç bir şey demək olmaz. Sabah müşahidə prosesində
biz seçkilərin necə keçəyini görəcəyik". Andres
Herkel sonda bildirib ki, müşahidə missiyası ilkin mövqeyini artıq seçkidən bir
gün sonra açıqlayacaq.