Təbriz
şəhərinin İran parlamentindəki keçmiş millət vəkili Əkbər Ələmi İran
prezidentliyi uğrunda yarışlara qatılmaq niyyətini açıqlayıb. “Rejaneus” Xəbər
Agentliyinin “Fars” Xəbər Agentliyinə istinadən yaydığı məlumata görə, cənab
Ələmi bildirib ki, namizədliyini irəli
sürmək hər bir vətəndaşın ilkin ictimai hüquqlarındandır və o, bu hüququndan
yararlanaraq prezidentliyə
namizədliyini irəli sürmək niyyətindədir. İranın Nəzarət Şurasının ötən
parlament seçkilərinə buraxmadığı cənab Ələmi,
“Yerdə olan tanrılar imkan versələr
prezidentliyə namzədliyimi irəli sürmək istəyirəm” deyə vurğulayıb.
İran
prezident seçkiləri gələn ilin iyun ayında keçiriləcək. İranın dini rəhbəri Əli
Xamneinin dəstək verdiyi prezident Əhmədinəjaddan başqa İslahatçılar
düşərgəsindən parlamentin keçmiş spikeri, Mehdi Kərrubi də namizədliyini irəli
sürəcəyini elan edib.
Qeyd edək ki, Əkbər Ələmi İran
Azərbaycanlılarının ana dilində təhsil hüququ ilə bağlı İran parlamentində bir
neçə dəfə məsələ qaldırmışdı. 2006-cı ilin mayında isə Azərbaycan şəhərlərində
baş vermiş etirazların zorla yatırılması,
əhaliyə atəş açılması, onlarla azərbaycanlının öldürülməsi, minlərlə
azərbaycanlı fəalın həbs edilməsi ilə bağlı parlamentdə məsələ qaldırmış və
İranın bir neçə naziri o, cümlədən daxili işlər nazirinin bu haqda hesabat
verməsini tələb etmişdir.