Pekin
bildirib ki, qarşıdan gələn yüksək səviyyəli iqtisadi danışıqlar zamanı
Birləşmiş Ştatları Çinin ABŞ-dakı yatırımlarını qoruyan iqtisadi siyasəti davam
etdirməyə çağıracaq. Çinin maliyyə nazirinin müavini Zu Quanyao jurnalistlərə
deyib ki, Çin nümayəndə heyəti Vaşinqtondan habelə ABŞ dollarının stabil
mübadiləsi üçün addımlar atmağı xahiş edəcək. Pekinin ABŞ-ın hökumət aksiyalarında 800 milyard dollarlıq yatırım ehtiyatı var və
Çin liderləri dəfələrlə Birləşmiş Ştatlardakı mülkiyyətinin təhlükəsizliyi
barədə narahatlığını izhar edib. Tərəflər 2 günlük Strateji və İqtisadi Dialoq
konfransında bir araya gələcək. Toplantı gələn həftənin bazar ertəsi günü
Vaşinqton şəhərində başlayacaq.