Tunis
prezidenti Zine əl-Abidin Ben Əli yenidən böyük üstünlüklə 5-ci müddətə
prezident seçilib. Tunis dövlət xəbər agentliyinin məlumatına görə, cənab Ben
Əli səslərin təxminən 90 faizini toplayıb. Bu göstərici isə onun 2004-cü ildə
topladığını 94 faizlik dəstəkdən kifayət qədər aşağıdır. 73 yaşlı prezident heç
vaxt ciddi rəqib sayılmayan 3 namizədlə mübarizə aparıb. Beynəlxalq insan
haqları qrupları Ben Əlinin hökumətinin siyasi müxalifəti boğmaqda və
azadlıqları məhdudlaşdırmaqda günahlandırır. Onlar deyir ki, hökumət Ben Əlinin
qələbəsini müxalifəti əzməklə təmin edib. Ben Əli artıq iyirmi ildən çoxdur ki,
Şimali Afrika ölkəsinə rəhbərlik edir.