Azərbaycan
Prezidenti yanında Qeyri-Hökumət Təşkilatlarına Dövlət Dəstəyi Şurası 2009-cu
ilin maliyyə yardımı müsabiqəsinin qaydalarını müzakirə edib. Müzakirələrdə bir
neçə yüz qeyri hökumət təşkilatı iştirak edib. Azərbaycanın
müstəqillik tarixində artıq ikinci ildir qeyri hökumət təşkilatlarına dövlət
büdcəsindən qrantlar verilməsi üçün vəsait ayrılır. İndiyədək vətəndaş
cəmiyyətlərinin bütün layihələri xarici dövlət və təşkilatların qrantları
hesabına maliyyələşib. İndi də dövlət büdcəsindən ayrılan vəsait qeyri-hökumət
təşkilatlarının layihələrinin yalnız bir hissəsini əhatə edir.
Azərbaycan
Prezidenti yanında Qeyri-Hökumət Təşkilatlarına Dövlət Dəstəyi Şurasının sədri
Azay Quliyev bildirib ki, 2009-cu ildə Şuranın ümumi büdcəsi 2 milyon 750 min
manat təşkil edəcək.Şura sədrinin
dediyinə görə, 2008-ci ildə qeyri-hökumət təşkilatlarının layihələrinə 1 milyon
200 min manat məbləğində maliyyə dəstəyi verilib. Bu il 365 qeyri-hökumət
təşkilatı Şuraya müraciət edib. Onlardan 190-nın təklifi müsbət qarşılanıb. Layihələrin
43-ü insan hüquq və azadlıqlarını dəstəkləməklə bağlıdır. O 2008-ci ildə maliyyələşən
layihələrin hamısının yerinə yetirildiyini bildirib.Müzakirələrdə
çoxsaylı təkliflər də irəli sürülüb. Müstəqil Elmi-Praktik Hüquq Mərkəzinin sədri Aydın Kərimov bildirib ki,
qeyri-hökumət təşkilatlarına qrant ayrılandan sonra vətəndaş sektorunda ciddi
təkan yaranıb. Bununla yanaşı, o problemlərin olduğunu da deyib.
Ekoloji Proqnozlaşdırma mərkəzinin rəhbəri Telman Zeynalov hesab edir
ki, layihələrin qiymətləndirilməsi zamanı neft sektoru ilə yanaşı qeyri neft
sektoruna da ciddi önəm verilməlidir. Onun fikrincə, qiymətləndirmə aparılarkən
ekologiya, sağlamlıq və ətraf mühitlə bağlı layihələr ayrıca diqqət mərkəzində
olmalıdır.
Çıxış edənlər
qanunların icrası və büdcə vəsaitlərinin xərclənməsinin monitorinqinin
aparılması ilə bağlı layihələrə ciddi ehtiyac duyulduğunu önə çəkib. Onların
fikrincə, bu sahələrdə şəffaflığa
ehtiyac duyulur. Sevdim Rəhmanov intellektual cəmiyyətin formalaşmasında
şəffaflığın mühüm önəmini qeyd edib.
Forumda
işsizlik, pensiyaçıların hüququ, regionlarda vətəndaş cəmiyyətinin inkişafı,
gender bərabərsizliyi, erkən nigahlar, hərbi hissələrdə monitorinqlərin
keçirilməsi, demoqrafiya elm, əsir və girovluqdan azad edilənlərin
reabilitasiyası, Azərbaycan dili, milli ideologiya ilə bağlı layihələrə önəm
verilməsi də təklif edilib. Natiqlərin əksəriyyəti isə qaçqınlar, məcburi
köçkünlər, deportasiya və müharibə qurbanlarının hüquqlarının müdafiəsi ilə
bağlı layihələrə üstünlük verib.