Sabah Azərbaycanda prezident
seçkiləridir. Səsvermə yerli vaxtla saat 8-də başlayıb 19-da başa çatacaq.
Mərkəzi Seçki Komissiyasının sədri Məzahir Pənahov bu gün keçirdiyi mətbuat
konfransında seçki məntəqələrinin səsvermə üçün tam hazır olduğunu bəyan edib.
Onun sözlərinə görə, ölkədə 4 milyon 800 mindən çox seçici var.
Sədr səsvermənin və səslərin
sayılmasının şəffaf və aşkar şəraitdə həyata keçiriləcəyini vəd edib. Cənab
Pənahovun sözlərinə görə, 500 seçki məntəqəsində səsvermənin gedişini və
səslərin sayılmasını internetdə canlı izləmək mümkün olacaq. Bu Avropa və
MDB-də ilk dəfə Azərbaycanda baş verəcək.
MSK sədri seçkilərin
monitorinqində 47 mindən çox müşahidəçinin iştirak edəcəyini deyib. Bunların 21
521 nəfəri siyasi partiyaların, 15777 nəfər qeyri hökumət təşkilatlarının nümayəndələri,
5802 nəfər isə şəxsi təşəbbüslü müşahidəçilərdir. MSK-da isə 2672 yerli və 1258
beynəlxalq müşahidəçi akkreditasiyadan keçib. Onlardan 409 nəfəri ATƏT Demokratik
Təsisatlar və İnsan Haqları Bürosunun, 376 nəfəri Müstəqil Dövlətlər Birliyinin, 34 -ü Avropa Şurası Parlament Asambleyasının,
15-i Avropa Parlamentinin, 16-sı MDB Parlament
Asambleyasının , 8 nəfəri GUAM-ın nümayəndələridir. Bundan başqa, seçkiləri Amerika,
Fransa, Bolqarıstan, Ukrayna, Böyük Britaniya, Rusiya, Polşa, İran və başqa
çoxsaylı ölkələrdən parlament nümayəndə heyətləri müşahidə edəcək. Ümumilikdə
seçkilərin monitorinqində dünyanın 59 ölkəsinin nümayəndəsi iştirak edir.
Cənab Pənahov bütün seçki prosesinin
müşahidəçilər və media üçün açıq olduğunu bir dana diqqətə çatdırıb.
MSK sədri həmçinin
seçkilərin ilkin nəticələrinin səsvermə başa çatdıqdan 3 saat sonra elan
ediləcəyini bildirib.
