Dövlət büdcəsindən
maliyyələşdirilən medianın fəaliyyəti seçicilərdə prezidentliyə namizədlər
haqqında tam təsəvvür formalaşdırmağa və səsvermə zamanı düzgün seçim etməyə
imkan vermir. Bu barədə mərkəzi qərargahı Parisdə yerləşən Beynəlxalq
“Sərhədsiz Reportyorlar” təşkilatının nümayəndəsi Elza Vidal bir ay ərzində aparılan monitorinqin
nəticələri ilə bağlı keçirdiyi mətbuat konfransında bildirib.
Onun sözlərinə görə,
monitorinq AzTV, İTV və ANS
televiziyalarını, həmçinin “Azərbaycan”, “Respublika”, “Xalq” və
“Bakinskiy raboçiy” qəzetlərini əhatə edib.
Xanım Vidalın sözlərinə görə, adı çəkilən KİV-lər seçkiləri boykot
edən müxalifətin fəaliyyətini işıqlandırmayıb. Bu zaman telekanallarda və
qəzetlərdə namizədlərin platformalarının və onların tele efirdə çıxışlarının
təhlili aparılmayıb.
”AzTV-də hazırki dövlət başçısına
bütün efir vaxtının 44,14%-i ayrıb. Onun birbaşa çıxışı isə efirdə birbaşa
çıxışların 68,84%-ni təşkil edib. Monitorinq göstərib ki, dövlət KİV-lərində
yalnız hazırki prezident, MSK, keçmiş prezident Heydər Əliyev, Heydər Əliyev
Fondu, digər dövlət müəssisələri və dövlət məmurları üstünlük təşkil edib.
Yalnız dövlət büdcəsindən maliyyələşməyən ANS telekanalı nisbətən daha çox
müxtəlifliyi ilə fərqlənib”.
Təşkilatın hesabatında bir sıra tövsiyələr də
yer alıb.
“Bütün namizədlərin KİV-ə bərabər və ədalətli çıxış hüququ sözbəsöz
Seçki Məcəlləsinə daxil edilməlidir; namizədlərin media ilə münasibətdə olan
hüquqları, xüsusilə şikayət proseduru Seçki Məcəlləsində daha spesifik
olmalıdır; icra hakimiyyəti, xüsusilə hazırkı prezident barədə xəbərlər seçki kampaniyası
dövründəki işıqlandırmada üstünlük təşkil etməməlidir; namizədlərin fəaliyyəti
barədə məlumatlar müəllif proqramlara daxil edilməlidir”-deyə təşkilatın
tövsiyəsində qeyd edilir.
Yeri gəlmişkən bildirim ki,
monitorinq Avropa Komissiyası tərəfindən maliyyələşdirilən “Seçki dövründə
media plüralizmin müdafiəsi” layihəsi çərçivəsində keçirilib.