Accessibility links

İlham Əliyev: Biz danışıqlara sadiqik


İlham Əliyev və Sergey Lavrov

İlham Əliyev və Sergey Lavrov

Prezident İlham Əliyev Rusiya xarici işlər naziri Sergey Lavrov ilə görüşüb. Görüşbə ikitərəfli münasibətlər və son günlər cəbhədə yaranmış gərgin durum diqqət mərkəzində olub.

Prezident Əliyev bildirib ki, aprelin 7-də Bakıda Rusiya, İran və Azərbaycanın xarici işlər nazirlərinin üçtərəfli formatda ilk görüşü keçiriləcək.

“Hesab edirəm ki, bu, ölkələrimiz arasında çox ciddi regional əməkdaşlıq prosesinin başlanğıcıdır. Azərbaycan dünyada yeganə ölkədir ki, eyni zamanda, həm Rusiya, həm də İranla həmsərhəddir. Bu, üç ölkə xalqlarının həm coğrafiyası, həm də qarşılıqlı əlaqələrinin tarixidir. Ölkələrimiz arasında bugünkü qarşılıqlı fəaliyyət də əlbəttə ki, əməkdaşlığın həm də çoxtərəfli formatda dərinləşməsini tələb edir”.

Prezident Azərbaycan-Rusiya əlaqələrinin yüksək səviyyəsindən,bütün sahələri əhatə edən strateji tərəfdaşlıqdan məmnun olduğunu diqqətə çatdırıb.

“Rusiya və Azərbaycan iki dost, iki qonşudur. Biz bu münasibətləri yüksək dəyərləndiririk, bu münasibətləri möhkəmləndirməyə və inkişaf etdirməyə səy göstəririk. Bu, həm qarşılıqlı siyasi fəaliyyətə, həm humanitar, iqtisadi və energetika sahələrində əməkdaşlığa, həm də, əlbəttə ki, Ermənistan-Azərbaycan, Dağlıq Qarabağ münaqişəsinin nizamlanması məsələsinə aiddir”.

Əliyev son günlər qoşunların təmas xəttində insan tələfatı ilə müşahidə olunan gərgin vəziyyət yarandığını deyib.

“Əlbəttə ki, bu da həm dünyada, həm regionda, həm də ictimaiyyət arasında narahatlıq doğurur. Rusiya bu halda yenidən təşəbbüs göstərdi və Rusiya tərəfinin vasitəçiliyi ilə atəşkəs haqqında razılaşma əldə olundu. Biz hesab edirik ki, bu, regionda vəziyyətin gərginləşməsinə imkan verməməyin yeganə yoludur. Atəşkəs rejiminə riayət olunurdu. Təəssüf ki, bu gün axşam Ermənistan tərəfi atəşkəsi pozdu”.

Prezident Azərbaycanın danışıqlar prosesinin davam etdirilməsinə kökləndiyini bildirib.

“Bu gün mən ATƏT-in Minsk qrupunun həmsədrlərini - səfirləri qəbul etdim. Onlara da dedim və indi mətbuat qarşısında da demək istəyirəm ki, Azərbaycan danışıqlar prosesinə sadiqdir. Biz bu münaqişəni sülh yolu ilə beynəlxalq hüququn norma və prinsipləri əsasında tənzimləmək istəyirik. Düşünürəm ki, atəşkəsin elan olunmasından sonra ötən 20 ildən çox müddət bizim məhz siyasi nizamlanmaya kökləndiyimizi sübut edir”.

Rusiyanın xarici işlər naziri Sergey Lavrov isə bildirib ki, Azərbaycan, Rusiya, İranb xarici işlər nazirlərinin üçtərəfli formatda görüşü Azərbaycanın təşəbbüsü ilə həyata keçirilir.

“Bu format sizin haqlı olaraq dediyiniz kimi, bir çox nöqteyi-nəzərdən daha sıx üçtərəfli siyasi, təhlükəsizlik, terrorizmlə mübarizə sahələrində əməkdaşlıq baxımından əhəmiyyətlidir. Nəzərə almaq lazımdır ki, üç ölkənin, həmçinin bizim digər qonşularımızın ərazilərindən terrorçuların təchizatı marşrutları, yaraqlıların trafiki keçir. Bu təzahürlərin qarşısının kollektiv əsaslarla alınması üçün qarşılıqlı fəaliyyətin qurulması zəruridir”.

Lavrov nəqliyyat marşrutları, iqtisadi əlaqələrin inkişafı, energetika sahəsində qarşılıqlı fəaliyyət baxımından regionun geostrateji, geosiyasi vəziyyətinin əhəmiyyətini qeyd edib.

Nazir kitərəfli münasibətlərin, strateji tərəfdaşlığın da nəzərdən keçiriləcəyini deyib.

Lavrov deyib ki, Rusiya həm Ermənistan, həm Azərbaycan üçün yaxın, həm də ATƏT-in Minsk qrupunun həmsədri olan ölkə kimi əvvəllər də, indi də məşğul olduğu Dağlıq Qarabağ münaqişəsinin nizamlanması prosesini son gərgin şəraitə görə ciddi çağırışla qarşılayıb.

“Uzun illər ərzində yəqin ki, bu, ən irimiqyaslı döyüş əməliyyatlarıdır.Həqiqətən biz - həm prezident, həm baş nazir, həm bizim nazirlik, əlbəttə ki, Müdafiə Nazirliyi və Baş Qərargah səviyyəsində tərəflərə atəşkəs barədə razılıq əldə edilməsi üçün zəruri olan bütün addımları atdıq. Bu razılaşmanın pozulmamasına dəstək verməyə hazır olacağıq”.

O bildirib ki, bu konkret məsələdə vəziyyəti sabitləşdirmək vacibdir.

“Ümid edirəm ki, son günlərin hadisələri bizi siyasi tənzimlənmə ilə daha fəal məşğul olmağa sövq edəcək. Bizim təkliflərimiz var. Biz bu təklifləri həmsədrlərlə birlikdə Azərbaycan ilə Ermənistan arasında razılaşmanın əldə olunması naminə daha fəal işə salmağa çalışırıq. Hesab edirəm ki, biz bu məsələlərə ortamüddətli və uzunmüddətli perspektivdə də diqqət yetirə biləcəyik”.

Rusiya həmsədrlərin göstərdikləri təşəbbüsləri tamamilə dəstəkləyir.

“Onlar Bakıya səfər etdilər, sabah təmas xəttində, birigün isə İrəvanda olacaqlar. ATƏT-in, əlbəttə ki, təkcə ATƏT-in yox, həm də Beynəlxalq Qırmızı Xaç Komitəsinin köməyi ilə ən yaxın vaxtlarda hansısa etimad tədbirləri görmək və siyasi prosesin bərpası üçün zəruri şərait yaratmaq vacibdir”, o qeyd edib.

XS
SM
MD
LG