Accessibility links

Bakı Metropoliteninin rəisi “Tağı Əhmədov 5 qəpikləri mənimsədi” məqaləsi ilə bağlı iddia qaldırıb.

“Azadlıq” qəzeti Bakı Metropoliteninin rəisi Tağı Əhmədova mənəvi zərər əvəzi olaraq 30 000 AZN (36 000 dollar) təzminat ödəməlidir. Yasamal Məhkəməsi iyunun 13-də belə qərar qəbul edib.
Bakı Metropoliteninin rəisi Tağı Əhmədov “Azadlıq” qəzetini difamasiyaya görə məhkəməyə verib. İddiaçı məhkəmədən qəzetin üzərinə təkzib vermək və 200 000 AZN təzminat ödəmək vəzifəsi qoyan qərar çıxarmağı xahiş etmişdi. Bu gün Yasamal rayon Məhkəməsinin hakimi Elçin Qurbanov metropoliten rəisinin iddiasını qismən təmin edib. Məhkəmə qərarına görə, “Azadlıq” qəzeti 8 aprel 2012-ci il sayında çap etdiyi “Tağı Əhmədov 5 qəpikləri mənimsədi” sərlövhəli yazıdakı bilgiləri təkzib etməli, bu yazıdan mənəvi zərər görən Tağı Əhmədova 30 000 AZN təzminat ödəməlidir.
“Azadlıq” qəzetini məhkəmədə Media Hüququ İnstitutunun (MHİ) vəkilləri təmsil edib. MHİ-nin məhkəmədə iştirak edən vəkili Fariz Namazlı məhkəmə qərarının qanunsuz olduğunu, müdafiə tərəfinin təqdim etdiyi etiraz və dəlilləri incələmədən qəbul edildiyini bildirib. Vəkil qərardan apelyasiya şikayəti verəcəklərini deyib.
Tağı Əhmədov tənqidçi qəzetdə dərc olunan “Tağı Əhmədov 5 qəpikləri mənimsədi” sərlövhəli məqalədən narazı qalıb. Sözügedən yazıda 2012-ci ilin yanvarında metroda gediş haqlarının artırılmasından bəhs olunub. Yasamal Məhkəməsinə təqdim olunan iddia ərizəsində qeyd olunur ki, qəzet yazısında Tağı Əhmədovun fəaliyyətinə qərəzli yanaşılıb. İddiaçı hesab edir ki, yazıdakı “... yanvar ayında metroda gediş haqqı on beş qəpikdən iyirmi qəpiyə qaldırılanda çoxlarının kartında beş qəpiklər qaldı. Bax, metropoliten rəisi həmən pulları mənimsəyib...” cümlələri onun şərəf və ləyaqətini aşağılayıb.

XS
SM
MD
LG