Accessibility links

Azərbaycan Xarici İşlər Nazirliyi Dağlıq Qarabağın tərəf olması fikrinə münasibət bildirib


Hikmət Hacıyev

Hikmət Hacıyev

Ermənistan xarici işlər nazirinin Dağlıq Qarabağın danışıqlarda tərəf kimi iştirak etməsi tələbi ilə bağlı çağırışlarına Azərbaycan Xarici İşlər Nazirliyi münasibət bildirib.

Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev bildirib ki, beynəlxalq hüququn prinsiplərinə və BMT Nizamnaməsinə zidd olaraq, “Azərbaycana qarşı güc tətbiq edərək ərazilərini işğal edən tərəf Ermənistan Respublikasıdır”.

“İşğal edilmiş ərazilərdə qanunsuz olaraq, Ermənistan silahlı qüvvələri mövcuddur. Münaqişə ilə əlaqədar qəbul edilmiş digər beynəlxalq sənədlərdə olduğu kimi, 16 iyun 2015-ci il tarixində Avropa İnsan Hüquqları Məhkəməsinin Böyük Palatasının "Çıraqov və digərləri Ermənistana qarşı" işi ilə bağlı qərarında da işğalçı tərəf kimi Ermənistanın məsuliyyəti bir daha təsbit olunub. Qərarda deyilir: “Ermənistan Respublikası özünün hərbi mövcudluğu, hərbi ləvazimat və təcrübə təmin etməklə əsaslı şəkildə ən erkən günlərdən etibarən Dağlıq Qarabağ münaqişəsinə cəlb olunub”, “onun hərbi dəstəyi sözügedən ərazilərin ələ keçirilməsi və onlar üzərində nəzarətin davam etdirilməsində həlledici amil olub və olmaqda davam edir. Nəticə etibarilə, Ermənistan Dağlıq Qarabağ və ətraf ərazilər, o cümlədən Laçın rayonu üzərində effektiv nəzarəti həyata keçirir”.

Ermənistan Azərbaycana qarşı törətdiyi təcavüz və işğalını ört-basdır etmək və beynəlxalq ictimaiyyəti aldatmaq üçün işğal edilmiş ərazilərdə qondarma rejim yaradıb.

5 aprel tarixində atəşkəs barədə razılıq da münaqişə tərəfləri kimi Ermənistan və Azərbaycan silahlı qüvvələri arasında əldə edilib. İndiyə qədər də işğalçı dövlət olaraq, məsuliyyət daşıyan tərəf kimi danışıqlar prosesində Ermənistan Respublikası iştirak edib və bundan sonra da belə olacaqdır”.

Azərbaycan Xarici İşlər Nazirliyi bildirir ki, Azərbaycan Respublikasının Dağlıq Qarabağ bölgəsinin erməni və azərbaycanlı icmaları vardır və rəsmi Bakı həmişə bu icmalar arasında təmasların yaradılmasının tərəfdarı olub.

XS
SM
MD
LG