Accessibility links

İranda uşaqlar üçün hərbi park açılıb


İRNA agentliyinin fotosundakı bu uşaq İranın düşmənlərinə qarşı müharibə aparmaq taktikasını öyrənir
İRNA agentliyinin fotosundakı bu uşaq İranın düşmənlərinə qarşı müharibə aparmaq taktikasını öyrənir

İranda bu həftə müharibədə döyüşmək və Qərb düşmənlərinə atəş açmağın öyrədilməsi məqsədilə yaşı 8-dən yuxarı uşaqlar üçün yeni park açılıb.

Məşhəd şəhərinin qərb hissəsində yerləşən "İnqilab Uşaqlarının parkı" 1980-ci illərdə İran-İraq müharibəsinin ildönümü münasibətilə hər il qeyd edilən "Müqəddəs Müdafiə Həftəsi" çərçivəsində açılıb.

"Parka gələn uşaqlar ABŞ və İsrailin bayraqları ilə dekorasiya edilmiş hədəflər də daxil olmaqla, virtual hədəflərə atəş açmaq üçün təlimlər keçir"-Həmid Sadegi

Raja xəbər agentliyinin verdiyi məlumata görə, Uşaq və Gələcək Mədəniyyət Evinin direktoru Həmid Sadegi deyib ki, "parka gələn uşaqlar ABŞ və İsrailin bayraqları ilə dekorasiya edilmiş hədəflər də daxil olmaqla, virtual hədəflərə atəş açmaq üçün təlimlər keçir".

Mühafizəkar Raja agentliyi Suriyada Bəşar Əl-Əsəd hökuməti tərəfində döyüşən minlərlə əsgərdən ibarət qüvvəsi olan İranın elitar İnqilab Keşikçiləri ilə bağlıdır. Açılış mərasimində İnqilab Keşikçilərinin bu ay Hələbdə həlak olmuş yüksək səviyyəli komandirinin ailə üzvləri nitq söyləyib.

Həmid Sadegi Amerikanın Səsinin müsahibə üçün müraciətinə cavab verməyib.

İranın dövlətə məxsus xəbər agentliyinin parkın açılışı haqda hazırladığı foto-sessiyada İnqilab Keşikçilərinin formasını geymiş silahlı uşaqlar nümayiş edirilib.​

Həmid Sadegi Raja agentliyinə bildirib ki, uşaqlara şiələrin Dəməşqdə müqəddəs ibadətgahına oxşar məbədi mühafizə etmək öyrədilib. İran Suriya müharibəsində müqəddəs ibadətgahı müdafiə etdiyini bildirir.

İnsan haqları fəalları ailələri uşaqların parkda fəaliyyətlərə qatılmamasına razı salmağa çalışdıqlarını bildirib.

"Lakin heç bir nüfuzumuz olmadığı üçün səylərimiz nəticə vermir və əgər bundan artıq fəaliyyət göstərsək problemlə qarşılaşa bilərik"-deyə fəallardan biri Amerikanın Səsinə bildirib.

"Biz beynəlxalq təşkilatları bu məsələlərə ciddi fikir verməyə çağırırıq, çünki bu, gələcəkdə ekstremizmin artmasına gətirib çıxara bilər. Onlar güclü təbliğat aparır və az imkanlı və təhsilsiz ailələri hədəf alır...bu isə uşaqların gələcəyini dəyişdirə bilər, onları zorakılıq yoluna aparıb çıxara və zorakılıq nümayiş etdirmək istəməyə sövq edə bilər"-deyə hüquq müdafiəçisi əlavə edib.

"Oğlanlar təbiətən müharibə oyunlarını sevir və buna oyun kimi baxır, amma onlar müharibə zonalarında onları nə gözlədiyini bilmir. Onların bu yolla ələ alınması ikrah doğurur və qəbuledilməzdir"-Roya Borumand

İnsan haqları fəalı rəsmilər tərəfindən təqib təhlükəsi qarşısında adının açıqlanmasını istəməyib.

​İranda insan hüquqlarının vəziyyətini müşahidə edən Əbdürrəhman Borumand Fondunun direktoru Roya Borumand bu tematik parkı "beynəlxalq protokolların açıq şəkildə pozulması və uşaqların hisslərindən sui-istifadə" adlandırıb.

"Onlar uşaqların gələcəyi və inamı ilə oynayaraq, onlarda gələcəkdə həyatlarına və qərarlar qəbul etmələrinə təsir göstərəcək müharibə həyəcanı yaradır"-deyə Roya Borumand Amerikanın Səsinə müsahibədə bildirib.

"Oğlanlar təbiətən müharibə oyunlarını sevir və buna oyun kimi baxır, amma onlar müharibə zonalarında onları nə gözlədiyini bilmir. Onların bu yolla ələ alınması ikrah doğurur və qəbuledilməzdir"-deyə o əlavə edib.

İran hökuməti çox vaxt müharibəni və hərbi qüdrətini tərənnüm edir.

Dövlətə məxsus televiziyada aprel ayında gəncləri Suriyada İran hərbi qüvvələrinin sıralarına qoşulmağa təşviq edən təbliğat videosu nümayiş etdirilib.

Videoda əllərində silah olan və "müqəddəs məbədləri qoruyan şəhidlər" haqda mahnı oxuyan uşaqlar göstərilib.

XS
SM
MD
LG