Accessibility links

Korrupsiya hesabatı: rəqəmlər və faktlar [Video]


Korrupsiyaya qarşı Mübarizə Baş İdarəsində mətbuat konfransı

Korrupsiyaya qarşı Mübarizə Baş İdarəsində mətbuat konfransı

Azərbaycan Baş prokuroru yanında Korrupsiyaya qarşı Mübarizə Baş İdarəsinin rəisi korrupsiyaya qarşı mübarizə ilə bağlı mətbuat konfransı keçirib

Azərbaycan Baş prokuroru yanında Korrupsiyaya qarşı Mübarizə Baş İdarəsinin rəisi Kamran Əliyev 2014-cü ilin birinci yarısında korrupsiyaya qarşı görülmüş işlərlə bağlı mətbuat konfransı keçirib. Mətbuat konfransında Korrupsiyaya qarşı Mübarizə üzrə Komissiyanın katibi Vüsal Hüseynov və qeyri hökumət təşkilatlarının təmsilçiləri iştirak edib.

“2104-cü ilin birinci yarısında vətəndaşların 1 603 müraciətinə baxılıb, 169 cinayət xarakterli material araşdırılıb. Bu materialların 53 faizi üzrə cinayət işi başlanıb. “Qaynar xətt” əlaqə mərkəzinə isə 2 864 müraciət daxil olub. Bu müraciətlərin 9-u üzrə cinayət işi başlanıb”, deyə Korrupsiyaya qarşı Mübarizə Baş İdarəsinin rəisi Kamran Əliyev bildirib.

Bununla yanaşı, idarənin istintaq şöbəsində birinci yarım ildə 147 şəxs barəsində 103 cinayət işinin istintaqı tamamlanaraq məhkəmələrə göndərilib. “Həmin cinayət işlərindən 3 şəxs barəsində 2 rüşvət vermə, 4 şəxs barəsində 4 iş rüşvət alma, 16 şəxs barəsində 11 iş vəzifə səlahiyyətlərini aşma, 7 şəxs barəsində 4 iş vəzifəli şəxsin səlahiyyətlərini mənimsəmə, 53 şəxs barəsində 38 iş mənimsəmə və israf etmə, 41 şəxs barəsində 25 iş dələduzluq və digər faktlarla bağlıdır”, o qeyd edib.

Məhkəmələrə göndərilmiş cinayət işləri üzrə vurulmuş 11 milyon 870 min manat ziyandan istintaq müddətində 6 milyon 10 min manat və ya 50,6 faizi ödənilib, qalan ziyanın təqsirləndirilən şəxslərin əmlakı üzərinə həbs qoyulmaqla ödənilməsi üçün tədbirlər görülüb.

Kamran Əliyevin sözlərinə görə, Korrupsiyaya qarşı Mübarizə Baş İdarəsinin təqdimatı və ya məlumatı ilə 82 nəfər vəzifəli şəxs cəzalandırılıb.

Korrupsiyaya qarşı Mübarizə üzrə Komissiyanın katibi Vüsal Hüseynov ölkədə korrupsiyaya qarşı mübarizə sahəsində işlərin gücləndirilməsi üçün tədbirlərin davam etdirildiyini bildirib. O bu arada əhalinin etimadını qazanmış “Asan” Xidmətin fəaliyyətini və bu sahənin genişləndirilməsi istiqamətində aparılan işlərdən danışıb. “Bütün dövlət qurumları elektron xidmətləri genişləndirir və internet səhifələrində fəaliyyətləri ilə bağlı hesabatlar dərc edir”, o qeyd edib.

V.Hüseynov həmçinin qanunvericilik sahəsində dəyişikliklərdən və milli fəaliyyət planınIn icrasından danışıb.

O suallara cavabda vəzifəli şəxslər barəsində korrupsiya və rüşvət faktları ilə bağlı hökumət orqanlarına müraciət edən şəxslərin hüquqlarının qanunla qorunacağını bildirib. “Yaxın zamanda bununla bağlı qanunvericiliyə dəyişikliklər ediləcək”.

Komissiyanın katibi eyni zamanda suallara cavabda məmurların gəlirləri barədə bəyannamə anketlərinin hələ də hazırlanmadığını bildirib. “Ümid edirəm ki, Nazirlər Kabineti yaxın zamanda anket nümunələrini hazırlayacaq. Biz bununla bağlı məktubla Nazirlər Kabinetinə müraciət etmişik”, V.Hüseynov bildirib.

QHT təmsilçiləri də bir sıra problemlərlə bağlı çıxış edib. Onlar mediada məmurların və onların yaxınlarının korrupsiya və rüşvət faktları ilə bağlı dərc edilən məlumatların araşdırılmasının, “Asan” Xidmətin xidmət sahələrinin artırılmasının, mənzil fırıldaqçılığı ilə bağlı cinayət işlərinin məhkəmələr tərəfindən sonadək araşdırılmasının vacibliyini qeyd edib. QHT təmsilçiləri dövlət qurumlarında da “Asan” Xidmətdə olduğu kimi şəffaf xidmət göstərilməsi ilə bağlı tədbirlər görülməsinin lazımlılığını bildirib.

XS
SM
MD
LG