Accessibility links

Azərbaycan komandasının forması yüksək rəylər alıb. Müxtəlif moda saytlarında Azərbaycanın Olimpiadaya üslub və zövq baxımından möhtəşəm gəlişindən yazılıb.


London Olimpiadasında ən gözəl və eleqant geyimdə olan komandalar arasında Azərbaycan da xüsusi qeyd edilir. Bu il Olimpiya oyunları üçün dünya ölkələrinin milli geyimləri Ralf Loren (Ralph Lauren), Stella Makkartni (Stella McCartney), Corcio Armani (Giorgio Armani) kimi dizaynerlər, Prada və Hermes kimi moda evləri tərəfindən hazırlanmışdır. Artıq London Olimpiya oyunlarına ən dəbli oyunlar adı verilib, özü də Armaninin özü tərəfindən.

Olimpiadanın açılışında dünya ölkələrinin minlərlə idmançısının paradı sanki dizayner yarışı idi. Modern üslubda ağ və qara formaları Armani tərəfindən hazırlanmış italyanlar və dəbli statusunu daşıyan fransızların eleqant görünməsinə adət etmiş müşahidəçilər bu il yüksək zövqlə hazırlanmış forma kimi Azərbaycan komandasının kostumlarını qeyd edib. Moda və üslubdan yazan ekspertlər və blogerlər Azərbaycan komandasının rahat və müasir stildə tikilmiş kostyumlarını böyük uğur kimi qiymətləndirərək, Olimpiadada İtaliya dizaynerlərinin daha müvəffəq olduğunu göstərir. “Elle” və “Marie Claire” kimi tanınmış moda jurnallarının veb səhifələrində, habelə internetdə müxtəlif moda saytlarında Azərbaycanın Olimpiadaya üslub və zövq baxımından möhtəşən gəlişindən yazılır.

Azərbaycan idmançıları üçün kostyum ansamblını hazırlayan Florensiyada “Ermanno Scervino” moda evi göy, qırmızı və yaşıl rənglərin kombinasiyasından istifadə edib. Azərbaycan Olimpiya komandasının rəsmi geyimi pambıq parçadan hazırlanmış göy rəngli pencək, qadınlar üçün düz ağ yubka, kişilər üçünsə ağ şalvar və qabağı düyməli ağ poplin köynəkdən ibarətdir. Ümumi görünüşü kişilər üçün üçrəngli ipək qalstuk və cib yaylığı, qadınlar üçünsə ipək şərf və pencəyin üstündən geyilmiş qırmızı nazik kəmər tamamlayır. İdmançıların pencəklərinin sol tərəfdə döşündə Azərbaycan bayrağının üzərindəki səkkizguşəli ulduz tikilib.

London dünyanın moda paytaxtlarından biridir və yəqin ki, bu baxımdan Olimpiadanın da böyük moda şousuna çevrilməsi təəccüb doğurmur. İdman dünyasının ən böyük tədbiri olan Olimpiya oyunları üçün rəsmi kostyum ansamblları və yarışlar üçün formaları bu il moda aləminin ən böyük ulduzları hazırlayıb. Corcio Armani eleqant minimalizm ideyasını bu dəfə italyanların Olimpiya formasına gətirib. Əvvəllər idman geyimləri dizayn etməsə də, Armanini modada t shirt fəlsəfəsinin banisi adlandırırlar. İtalyan komandasının üzgüçülük üzrə yarışlarda forması isə Prada evi tərəfindən hazırlanıb.

Amerika patriotizmini modada təcəssüm etdirəm Ralf Lorenin ABŞ komandası üçün hazırladığı formalar zövq baxımından təqdirəlayiq görülsə də, məhz vətənpərvərlik baxımından böyük mübahisələrə səbəb olub. ABŞ komandasının Olimpiya forması 1948-ci ildə Londonda Yay Olimpiya oyunlarında iştirak edən Amerika idmançılarının geyimi əsasında hazırlanıb. İkinci Dünya müharibəsindən sonra keçirilən oyunların ruhu Ralf Lorenin bugünkü kostyum ansamblında öz əksini tapıb. Lakin həm ənənəvi, həm də partriotik görünən Team USA üçün geyimlərin Çində hazırlanması ABŞ-da ictimaiyyətin diqqətini cəlb etmiş və Konqresdə müzakirəyə çıxarılmışdır. Konqresmenlər növbəti Olimpiya oyunları üçün ABŞ atletlərinin formalarının Amerika istehsal edilməsilə bağlı qanun qəbul etmişdir.

Olimpiya oyunlarına ev sahiblyii edən Britaniyanın rəsmi formasını hazırlamaq üçün dizayner Stella Makkartni idman malları istehsal edən Adidas şirkəti ilə iki il bundan əvvəl işləməyə başlamışdır. Gənc, lakin moda dünyasında artıq böyük ad qazanmış Stella Makkartni əfsanəvi Beatles qrupunun solisti Pol Makkartninin qızıdır. Britaniyalılar Stella Makkartninin yüksək texnologiyalar dövrünün ab-havasına uyğun olaraq hazırladığı geyimlərdə ölkənin simvolu olan rənglərin olmamasını bir o qədər rəğbətlə qarşılamayıb. Lakin moda ekspertləri ağ və qızılı rənglərin kombinasıyası əsasında hazırlanmış rəsmi geyim və yarışlarda iştirak üçün başqa formalar haqda yüksək fikirdədir.

Bu il Londonda Yay Olimpiya oyunlarında daha bir tanış ada da rast gəlmək olar. Yamayka Olimpiya komandasının olduqca müsbət qarşılanan rəsmi forması raggae ustası mərhum Bob Marlenin qızı Sedella Marle tərəfindən hazırlanıb. Puma idman malları şirkəti ilə çalışan dizaynerin geyimləri parlaq rənglər və patriotizmi ilə seçilir.

Fransa Olimpiya komandasına gəldikdə, burada ekspertlərin hamısı atçılıq idmanı üzrə yarışlarda fransız atletlər üçün Hermes moda evi tərəfindən hazırlanmış pencəklərə ən yüksək bal verir. 200 il bundan əvvəl atlar üçün yəhər hazırlayan Hermes nəfis dəri məmulatları istehsal edir. Bu moda evinin atçılıq idmanı üzrə yarışlar üçün geyim hazırlaması buna görə təsadüfi deyil. Sonuncu dəfə Hermes Fransa Olimpiya komandası üçün geyimləri 1996-cı ildə Atlantada Yay Olimpiya oyunları keçirilən zaman hazırlamışdı.

  • 16x9 Image

    Dilşad Əliyarlı

    Jurnalist və yazar Dilşad Əliyarlı 17 ildən artıqdır "Amerikanın səsi"ndə çalışır. Azərbaycan xidmətində televiziya proqramlarının yaradıcılarından biri olan Dilşad Əliyarlı "Amerika icmalı" proqramının redaktoru və aparıcısıdır. D.Əliyarlı ABŞ-dan Azərbaycan dilində yayımlanan ilk televiziya xəbər proqramının ilk aparıcısı olub. 

XS
SM
MD
LG