Accessibility links

Vətəndaş Mehman Hüseynov konkret ittiham əsasında həbs edilib və məhkəmə araşdırması zamanı onun əməlində cinayət tərkibi olduğu tam təsdiqini tapıb.

Bu barədə yerli mediaya Azərbaycan Prezidentinin İctimai-siyasi məsələlər üzrə köməkçisi Əli Həsənov son günlər Mehman Hüseynovun həbsi ilə əlaqədar bəzi daxili və xarici qruplar, təşkilatlar tərəfindən Azərbaycan hakimiyyətinə ünvanlanmış çağırışlara münasibət bildirərkən deyib.

Ə.Həsənov bildirib ki, M.Hüseynov məhkəmənin qərarına əsasən 2 il müddətinə azadlıqdan məhrum edilib.

PA rəsmisi qeyd edib ki, bütün demokratik ölkələrdə olduğu kimi, Azərbaycanda da vətəndaşlar, təşkilatlar və s. məhkəmələr vasitəsilə öz hüquqlarını müdafiə edirlər.

“Məhkəmələr də yalnız qanunvericiliyin tələblərini rəhbər tutur və qanuna uyğun qərarlar çıxarırlar. Eyni zamanda, Azərbaycanın məhkəmə sistemi hüquqlarının pozulduğunu iddia edən hər bir şəxsə yuxarı məhkəmə instansiyasında hüququnu bərpa etmək imkanını təmin edir. Buna görə də Mehman Hüseynovun həbsini onun peşə fəaliyyəti ilə əlaqələndirmək və siyasiləşdirmək, məhkəmənin Azərbaycan qanunvericiliyinə uyğun çıxardığı qərarı şübhə altına almaq cəhdləri yolverilməzdir. Hesab edirəm ki, bu məsələ bəlli daxili və xarici siyasi qruplar, onların təsiri altında olan təşkilatlar tərəfindən süni şəkildə siyasiləşdirilir. Xatırlatmaq istərdim ki, hüquqi dövlət olan Azərbaycanda məhkəmələr müstəqildir və siyasi kampaniyalarla, siyasi təzyiq vasitəsilə onların qərarlarına təsir göstərmək mümkün deyil”, o qeyd edib.

Bloger Mehman Hüsenovun həbsi ilə bağlı çoxsaylı beynəlxalq və yerli təşkilatlar tənqidi bəyanatlarla çıxış edib, blogerin həbsdən azad edilməsini tələb edib. Dünayda tanınmış 24 beynəlxalq təşkilat Azərbaycan hökumətini söz azadlığını, tənqidi fikirləri boğmaqda günahlandırıb.

XS
SM
MD
LG