Accessibility links

Səid Mətinpurun aclıq aksiyası davam edir


Tanınmış güneyli siyasi məhbus Səid Mətinpur bu yaxınlarda Tehranin Evin həbsxanasında təkadamlıq kameraya köçürülüb. Tehran universitetinin fəlsəfə fakültəsinin məzunu, yazar, jurnalist və hüquq müdafiəçisi olan Səid Mətinpur 2007-ci ildə həbs edildikdən sonra 8 il həbs cəzasına məhkum edilib. O, yeddi ilə yaxındır Evin həbsxanasında saxlanılır. Səid Mətinpurun xanımı Ətiyə Tahiri həyat yoldaşının Evin həbsxanasında məhbuslara qarşı zorakılığa etiraz olaraq aclıq aksiyasına başladığını bildirib.

Amerikanin Səsinin Vankuverdəki müxbiri Əlirza Quluncu “Amerika icmalı” proqramında Səid Mətinpurun durumu ilə bağlı son məlumatları şərh edib.

Əlirza Quluncu Səid Mətinpurla birlikdə 21 məhbusun aclıq aksiyasına davam etdiyi haqda məlumatların verildiyini bildirir. Onun sözlərinə əsasən, Evin həbsxanasında məhbusların hücuma məruz qalması və orada baş verən qanunsuzluqlara etiraz olaraq keçirilən aclıq aksiyası İran Azərbaycanı haqda məlumatları açıqlayan veb səhifələrin diqqət mərkəzindədir. Əlirza Quluncu bildirib ki, verilən məlumatlara əsasən, Evin həbsxanasında Səid Mətinpur da daxil olmaqla, aclıq aksiyası keçirən bir neçə başqa məhbus təkadamlıq kamerada saxlanılır.

Səid Mətinpurun xanımı Ətiyə Tahiri ilə Amerikanın Səsinə müsahibədə Evin həbsxanasında həyat yoldaşının və digər məhbusların fiziki təzyiqə məruz qaldığını deyib. Ətiyə Tahiri həyat yoldaşı ilə qısa görüşdə onun fiziki cəhətdən zəif göründüyü bildirib. O, görüşü belə bir təsvir edib: "Vaxt çox deyildi, amma o 5-6 dəqiqədə mənə dedi ki, bu işi heç bir dəlil olmadan görüblər, bu, əslində qanunsuzluqdur. Heç bir dəlil olmadan gəlib bizi vurublar, mən heç bir iş görməmişəm, burada zindandan heç kəs bir iş görməyib, gəlib tökülüşüb vurublar, axırda da aparıblar infradiya (təkadamlıq kameraya). Onlar buna etiraz ediblər və Səid də buna etiraz olaraq yemək yemir, dil-dodağı qurumuşdu, rəngi ağarmışdı, bir az arıqlamışdı, saçlarını qırxmışdılar."

Əlirza Quluncunun sözlərinə görə, Ətiyə Tahiri də həyat yoldaşının zorakılığa məruz qalmasına etiraz olaraq aclıq aksiyasına başlayıb, lakin sonradan aclığı dayandırıb. Ətiyə Tahiri müsahibə zamanı prezident Həsən Ruhaninin hakimiyyəti dövrü insan haqları sahəsində vəziyyətdə dəyişikliyin olmadığını qeyd edib.

Beynəlxalq insan haqları qrupları, o cümlədən “Amnesty International” İranda siyasi məhbuslar, o cümlədən, Səid Mətinpurun durumu ilə bağlı narahatlıqların ifadə ediblər. Əlirza Quluncu İran hökumətinin insan haqlarının durumu ilə bağlı beynəlxalq təşkilatların bəyanatları və çağırışlarına əhəmiyyətsiz qoyduğunu bildirib. Onun sözlərinə əsasən, İran hökuməti BMT-nin İnsan Hüquqları Şurasının İran üzrə məruzəçisi Əhməd Şahidin ölkədə insan haqlarının sistematik şəkildə pozulmasına son qoyaraq, islahatlar keçirilməsi haqda tövsiyələri ilə bağlı indiyə kimi addımlar atmayıb.
  • 16x9 Image

    Dilşad Əliyarlı

    Jurnalist və yazar Dilşad Əliyarlı 17 ildən artıqdır "Amerikanın səsi"ndə çalışır. Azərbaycan xidmətində televiziya proqramlarının yaradıcılarından biri olan Dilşad Əliyarlı "Amerika icmalı" proqramının redaktoru və aparıcısıdır. D.Əliyarlı ABŞ-dan Azərbaycan dilində yayımlanan ilk televiziya xəbər proqramının ilk aparıcısı olub. 

XS
SM
MD
LG