Səudiyyə Ərəbistanı 25 ildən sonra İraqın paytaxtında səfirliyini açıb.
İraqın xarici işlər naziri İbrahim Əl-Cəfəri yeni səfir Tamer Əl-Sabhanın səlahiyyətlərini qəbul edib.
Tərəflər iki ölkə arasında qarşılıqlı əlaqələrin möhkəmləndirilməsi yollarını müzakirə edib.
Səudiyyə Ərəbistanı İraqla diplomatik əlaqələrini 1990-cı ildə İraq diktatoru Səddam Hüseynin Küveyti işğalından sonra dayandırmışdı.
Diplomatik missiyanın bərpası şiə İraqla sünni körfəz ölkəsi arasında münasibətlərin istiləşməsinə işarədir.
İki ölkə arasında gərginliklər İraqın baş naziri Heydər Əl-Əbədinin hakimiyyətə gəlməsi ilə azalmağa başlayıb.
Onun sələfi Nuri Əl-Maliki Qətər və Səudiyyə Ərəbistanını İŞİD-i maliyyələşdirməkdə günahlandırırdı. Bu ittihamlar hər iki ölkə tərəfindən rədd edilib.
Bir neçə ay əvvəl Qətər İraqdakı səfirliyinin fəaliyyətini bərpa edərək, Zayed Xayarini səfir kimi o ölkəyə göndərib.