Accessibility links

NİDA-çı gənc İlkin Rüstəmzadə yenə cəza kamerasına salınıb


İlkin Rüstəmzadə

İlkin Rüstəmzadə

Bu barədə NİDA Vətəndaş Hərəkatının bəyanatında deyilir

Həbsdə olan NİDA-çı gənc İlkin Rüstəmzadə 2-ci dəfə karserə (cəza kamerası) salınıb.Bu barədə NİDA Vətəndaş Hərəkatının bəyanatında deyilir.

“18 dekabrda İlkin Rüstəmzadənin atası Kürdəxanı təcridxanasına oğluna sovqat aparan zaman bilib ki, İlkin karserə salınıb. O, son bir ayda ikinci dəfədir karserə salınır. Karserə salınma ilə bağlı İlkinin atasına əsaslı heç bir səbəb deyilməyib. İlkin Rüstəmzadənin birinci dəfə cəza kamerasına salınması onun İnsan Hüquqları ilə bağlı İşçi Qrupu barədə yazısına görə idi. “

Nidaçılar hesab edir ki, İlkin Rüstəmzadənin bu dəfə karserə salınması Bakı Apellyasiya Məhkəməsində çıxışı və həbsxana rəhbərliyinin onunla davranışına etirazı və problemləri ictimailəşdirməsi səbəb olub.

”İlkin Rüstəmzadənin vəkilləri məsələnin hüquqi tərəfləri ilə maraqlanırlar. Səbəblərlə bağlı detallı məlumat yayacağıq”, deyə sənəddə deyilir.

NİDA Vətəndaş Hərəkatı hakimiyyətdən, vəzifəli şəxslərdən qanunsuz əməllərindən əl çəkməyi, təziylərə son qoyulmağı tələb edir. Həmçinin, insan haqları ilə bağlı qurumları məsələni diqqətdə saxlamağa çağırır.

2014-cü il mayın 6-da Bakı Ağır Cinayətlər Məhkəməsi NİDA fəallarını 2013-cü il 10 mart etiraz aksiyası zamanı kütləvi iğtişaşlar planlaşdırmaqda, qanunsuz olaraq partlayıcı maddə və narkotik saxlamaqda, habelə xuliqanlıqda təqsiri bilərək 6 ildən 8 ilədək müxtəlif müddətli həbs cəzalarına məhkum edib. İlkin Rüstəmzadə 8 il azadliqdan məhrum edilib.

Gənclər ittihamları qəbul etmir və cinayət təqibinin siyasi motivli olduğunu bildirirlər.

Amnesty İnternational 8 NİDA fəalının hamısını “vicdan məhbusu” elan edib.

XS
SM
MD
LG