Accessibility links

"Sevil Massivi"ndən zərərçəkənlər [Video]


Avqustun 11-də Bakı Ağır Cinayətlər Məhkəməsində cinayət işi üzrə hazırlıq iclası olacaq

Avqustun 11-də Bakı Ağır Cinayətlər Məhkəməsində “Sevil” MTK-nin əməkdaşlaşlarına qarşı cinayət işi üzrə hazırlıq iclası olacaq.

Məhkəmə iclasından öncə çoxsaylı zərərçəkən sakin Bakı Ağır Cinayətlər Məhkəməsinin qarşısına toplaşıb. Onlar evlərini və ya pullarını tələb edir.

Baş Prokurorluğun mətbuat xidmətina görə, “Sevil Massivi” MTK-da külli miqdarda vergilərin dövlət büdcəsinə ödənilməsindən yayındırılması faktına əsasən Vergilər Nazirliyində başlanmış cinayət işi üzrə istintaq aidiyyəti üzrə Baş prokuror yanında Korrupsiyaya qarşı Mübarizə Baş İdarəsində aparılıb.

Aparılmış istintaq zamanı kooperativin təsisçisi Aynur Zeynalovun həmin kooperativin direktoru Elçin İsmayılov və digərləri ilə qabaqcadan əlbir olub 2013-2014-cü illərdə 172 min 507 manat məbləğində sadələşdirilmiş vergini dövlət büdcəsinə ödəməkdən yayınmalarında, habelə xüsusi razılıq (lisenziya) tələb olunduğu halda belə razılıq alınmadan qanunsuz sahibkarlıq fəaliyyəti ilə məşğul olaraq 99 min 597 manat məbləğində gəlir əldə etmələrində şübhələr üçün əsaslar olduğundan Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən onlara Cinayət Məcəlləsinin 192.2.2 (qanunsuz sahibkarlıq) və 213.2.2-ci (vergi ödəməkdən yayınma) maddələri ilə ittiham elan edilməklə barələrində məhkəmənin qərarı ilə həbs qətimkan tədbiri seçilib.

Qeyd edilənlərlə yanaşı, Abşeron rayon Hökməli bələdiyyəsinin sədri Mirnamat Miradiyevin bələdiyyə ərazisində yerləşən torpaq sahələrini A.Zeynalov və E.İsmayılovun bilavasitə şərait yaratmaları ilə müxtəlif şəxslərə sataraq ümumilikdə sonunculardan 170 min manat məbləğində rüşvət almasında şübhələr üçün əsaslar olduğundan Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən ona Cinayət Məcəlləsinin 311.3.3-cü (rüşvət alma) maddəsi ilə ittiham elan edilməklə ağır xəstəliyi ilə əlaqədar barəsində həbslə bağlı olmayan qətimkan tədbiri seçilib.

İstintaqla həmçinin müəyyən edilib ki, “Sevil Massivi” MTK-nın məsul şəxsləri Abşeron rayon Hökməli bələdiyyəsinin sədri M. Miradiyevlə əldə etdikləri şifahi razılaşmaya əsasən bələdiyyənin mülkiyyətində olan 30 hektar perspektiv inkişaf torpaqlarını, eləcə də ayrı-ayrı şəxslərin mülkiyyətində olan “At yalı” və “Sonalı sahəsi” adlandırılan 110 hektar örüş torpaqlarını qanunsuz olaraq zəbt edərək həmin torpaqların vətəndaşlara faizsiz kreditlə satışını həyata keçiriblər. Vətəndaşlar tərəfindən isə həmin torpaq sahələrində layihə-smeta sənədləri olmadan, dövlət qeydiyyatına alınmadan 200 fərdi yaşayış evinin tikintisi həyata keçirilib. Kredit ödənişləri başa çatdıqdan sonra bələdiyyəyə məxsus olmayan sahələr bələdiyyə tərəfindən hərraca çıxarılmaqla satılaraq vətəndaşların adlarına rəsmiləşdirilib.

Bundan başqa, “Sevil Massivi” MTK tərəfindən qeyd olunan ərazinin təyinatına uyğun olmadan orada 100-dən artıq çoxmənzilli yaşayış binalarının tikintisi nəzərdə tutulub, həmçinin müvafiq dövlət qurumları ilə razılaşdırılmadan, o cümlədən qanunsuz olaraq aparılan tikinti işlərinin dayandırılması barədə Fövqəladə Hallar Nazirliyinin rəsmi xəbərdarlıqlarına məhəl qoymayaraq binaların 14-nün özülü qazılmaqla, onlardan 4-də ilkin tikinti işləri həyata keçirilib. Bununla belə, təyinatına görə örüş torpaqları olan həmin sahələrdə qanunsuz tikiləcək çoxmənzilli yaşayış binalarından vətəndaşlara mənzillər satılıb.

“Sevil Massivi” MTK-da tikinti və satış işləri dayandırılıb, törədilmiş cinayət nəticəsində fiziki və hüquqi şəxslərə vurulmuş ziyanın müəyyən edilərək onların hüquqlarının bərpa olunması, eyni zamanda cinayətin digər iştirakçılarının müəyyənləşdirilməklə istintaqa cəlb olunmaları istiqamətində zəruri istintaq-əməliyyat tədbirləri Baş prokuror yanında Korrupsiyaya qarşı Mübarizə Baş İdarəsi tərəfindən aparılıb.

Baş prokuror yanında Korrupsiyaya qarşı Mübarizə Baş İdarəsnin rəisi Kamran Əliyev bu ilin iyulunda bildirib ki, artıq 1279 şəxsə dəyən ziyan ödənilib.

“Kimə ki, dəyən ziyan ödənilməyib, həmin şəxslərdən bəziləri onlara təklif olunan şərtlərlə razılaşmırlar. Məsələn, 3-cü mərtəbədən ev alana 7-ci mərtəbədən ev verilir, həmin şəxs isə istəmir. Yerdə qalanların işi də məhkəmələr vasitəsilə həll olunacaq", K. Əliyev bildirib.

Ümumilikdə “Sevil Massivi” işi üzrə 2 mindən çox insan zərər çəkib. Sakinlər deyilənlərlə razılaşmır. Bakı Ağır Cinayətlər Məhkəməsinin qarşısına toplaşan zərərçəkmişlərin bir çoxu həbs edilən şəxslərin heç də əsas şəxslər olmadığını bildirib. Zərəçəkmişlər torpaq sahələri ilə bağlı mülkiyyət sənədlərini nümayiş etdirib və bildiriblər ki, onların torpaqlarının özəlləşdirilmə sənədləri saxtadırsa buna icra qurumları cavab verməlidir.

XS
SM
MD
LG