Noyabrın 16-da Sürixdə SOCAR ilə “Exxon Mobil Central Europe Holding GmbH” şirkəti arasında “Exxon Mobil”in İsveçrə filialı olan “Esso Schweiz GmbH” şirkəti səhmlərinin alqı-satqısı üzrə müqavilə imzalanıb. Bu haqda SOCAR-ın mətbuat xidməti məlumat verib.
Məlumata əsasən, SOCAR yaxınlarda İsveçrədə təsis etdiyi emal və satış üzrə törəmə müəssisəsi olan “SOCAR Energy Switzerland” şirkəti vasitəsilə “Esso Switzerland”ın yüksək səviyyəli xidmətlər göstərilməsini əhatə edən kommersiya fəaliyyətini davam etdirmək niyyətindədir.
Şirkət, sahibinin dəyişməsindən sonrakı 12 ay ərzində əvvəlki ESSO brendi altında fəaliyyət göstərəcək. Aviasiya, habelə yük avtomobil nəqliyyatı və neft məhsullarının saxlanması üçün rezervuarlarla əlaqədar biznes şəbəkəsinin debrendinqi isə sövdələşmədən sonrakı 30 gün ərzində həyata keçiriləcək. Keçid dövründə bütün mövcud müqavilə öhdəlikləri və istehsalat prosesləri olduğu kimi qalacaqdır. Keçid müddəti başa çatdıqdan sonra (2012-ci ilin 3-cü rübündə) şirkət yeni brendlə - SOCAR brendi ilə istehlakçıların xidmətinə başlayacaq.
İmzalanma mərasimində SOCAR prezidenti Rövnəq Abdullayev bildirib ki, keyfiyyətli yanacaq növləri və yanacaqdoldurma məntəqələrindəki digər xidmət şəbəkəsi vasitəsilə SOCAR isveçrəli istehlakçılara pərakəndə satış üzrə yüksək səviyyəli xidmət göstərəcək. Bundan başqa, SOCAR kommunal-məişət yönümlü yanacağın və balon qazının distribüterləri, habelə aviasiya sahəsində fəaliyyət göstərən sənaye müştəriləri üçün etibarlı tərəfdaş olacaq.
Sazişə əsasən, “Esso Switzerland”ın alınması ilə həmin şirkətə məxsus 170-dən artıq yanacaqdoldurma məntəqəsini özündə birləşdirən pərakəndə satış şəbəkəsi, şirkətin sənaye və topdansatış müştəriləri üçün yanacaq marketinqi ilə məşğul olan qurumu (bu qurum bütün İsveçrə ərazisində kommunal-məişət təyinatlı yanacaq həcmlərinin və balon qazının müstəqil distribüterlərə satışını həyata keçirir), Vangen-Oltendəki Qazdoldurma zavodu, eyni zamanda İsveçrənin Cenevrə və Sürix hava limanlarındakı aviasiya yanacaqdoldurma məntəqələri və müvafiq müştərək müəssisələrin səhmləri, eləcə də terminallara və boru kəmərlərinə malik müştərək müəssisəyə nəzarət edən İsveçrə təchizat və paylama şirkətinin səhmləri Azərbaycan Dövlət Neft Şirkətinin sərəncamına keçib.
Turan Agentliyi hesab edir ki, bununla SOCAR Avropadakı kommersiya fəaliyyətinin genişləndirilməsi üzrə yeni bir uğurlu addım atıb.
Qeyd edək ki, bundan öncə oktyabrın 31-də SOCAR Rumıniyada 11 yanacaqdoldurma kompleksini istifadəyə verməklə Avropa Birliyində neft məhsullarının parəkəndə satışına start verib.
SOCAR neft nəhənglərindən olan ESSO Switzerland şirkətini satın alıb
SOCAR ilə “Exxon Mobil Central Europe Holding GmbH” şirkəti arasında “Exxon Mobil”in İsveçrə filialı olan “Esso Schweiz GmbH” şirkəti səhmlərinin alqı-satqısı üzrə müqavilə imzalanıb.