Tailand kralı yeni konstitusiya qəbul edib. Bu, 1932-də mütləq monarxiyanın ləğvindən bəri ölkənin 20-ci xartiyasıdır.
Kral Vaciralinqkorn sənədi cümə axşamı Banqkokda yerləşən Ananta Samaxom Taxt Zalında ölkə ordusunun yüksək rütbəli üzvərinin iştirak etdiyi mərasim zamanı imzalayıb.
Hərbi xunta konstitusiyanın seçkinin 2018-ci ilin noyabr ayınadək keçirilməsinə yol açacağını deyib. Amma bundan öncə xunta dəfələrlə seçkiləri təxirə salıb.
Tənqidçilər deyir ki, xartiyanın müddəaları qeyri-demokratikdir və hakimiyyətin seçilmiş siyasətçilərdən daimi bürokratiya və orduya ötürülməsinə gətirib çıxaracaq.
Ordu 2014-cü ildə səsvermə yolu ilə seçilmiş höküməti devirib. Bu, səkkiz il ərzində ölkədə baş verən ikinci çevriliş idi.
