Tvitter bütün dünyada özünü azad sözün müdafiəçisi kimi təqdim etsə də, Türkiyədə baş vermiş uğursuz çevriliş cəhdinin ardınca bu sosial şəbəkəni hökumətin göstərişi ilə “senzura tətbiq etməkdə” günahlandırıblar.
Tvitter hələlik bu ittihamlara cavab verməyib. Lakin əvvəllər bildirilib ki, şəbəkənin Türkiyədəki siyasəti “qadağanla üzləşməmək məqsədilə senzuradir”.
Dailydot saytı yazır ki, Tvitter bu siyasətinə görə Türkiyədə dilemma ilə üzləşir. Əgər şəbəkə Türkiyə hökumətinin dissidentləri susdurmaq üçün getdikcə artmaqda olan senzura tələblərinə əməl etməsə, onda hökumət ona bütün ölkədə qadağan qoya bilər ki, bu da hamını susdurar.
Lakin Türkiyədə azad sözə qarşı dözülməz şəkil almış repressiyalar Tvitter-in “kompromisli fəaliyyətini” absurd edir.
Ərdoğan ailəsinə aid tvitlər
Tvitter Türkiyədə qadağanlarla əvvəllər də üzləşib. 2014-cü ilin 20 martında, bələdiyyə seçkilərinə 10 gün qalmış Recep Tayyip Erdoğan Tvitteri bütün ölkədə qadağan etmişdi.
O zaman Tvitterdə Türkiyədə qalmaqala səbəb olmuş korrupsiya iddiaları ilə bağlı məlumatlar dövr edirdi. Bu korrupsiya iddialarının bir qismi də şəxsən Erdoğanın ailə üzvlərinə aid idi.
Qadağanın 6-cı günündə Tvitter öz fəaliyyətinin ilk “kapitulyasiyasına” razı olmuşdu.
Şəbəkə Türkiyəyə münasibətdə “bir ölkədə tvitləmənin bloklanması” adlanan siyasət tətbiq etməyə başlamışdı. Tvitterin blokladığı ilk heşteq @oyyokhirsiza (oğruya səs verməyin) olmuşdu.
Dailydot yazır ki, Erdoğanın partiyası bu seçkidə qalib gəlsə də, Tvitterin “spesifik siyasəti” dəyişməz qalıb.
Bundan ilhamlanan Türkiyə hökuməti tvitlərin kütləvi senzurasına başlayıb. Məsələn korrupsiya iddiaları ilə bağlı sənədləri paylaşdığına görə bir jurnalistin hesabı üç dəfə bloklanmışdı.
Tvitter Türkiyənin Suriyada islamçılara silah verməsini açıqlayan bir qəzetin 6 tvitini “gizlətmişdi”.
Tvit bloklamaq “çempionu”
O vaxtdan bəri, son iki ildə Türkiyə Tvitter senzurasına görə “dünya çempionu” olub. Erdoğan hökumətinin göstərişi ilə iki ildə 618 hesab bağlanıb, 5826 tvit bloklanıb.
Bu arada aparıcı internet azadlığı qruplarından The Electronic Frontier Foundation Tvitter-i fərqli səslərin susdurulmasında Türkiyə hökumətinə əlaltılıqda ittiham edib.
Lakin bu da xəbər verilir ki, Tvitter hesabların bağlanmasına dair Türkiyə məhkəmələrinin qərarlarına ciddi müqavimət göstərir və bir sıra hallarda qərarlar ya qismən icra olunur, ya da icrasız qalır.
Dailydot yazır ki, Tvitter hesabları bağlananların böyük bir qismini kürdyönlü fəallar və Gülen hərəkatına bağlı olmaqda şübhəli bilinənlər təşkil edirlər.
Tvitter öz qaydalarına görə, hökumətin senzura tələbi ilə bağlı olan istifadəçilərə elektron məktubla bildiriş göndərməlidir.
Lakin Türkiyədə hesablarına bu və ya digər şəkildə qadağan qoyulmuş jurnalistlərin demək olar hamısı belə e-mail almadıqlarını bildirirlər.
Dailydot yazır ki, Tvitter bu iddilarala bağlı şərh verməkdən imtina edir.
