"Beynəlxalq Bankın keçmiş prezidenti Cahangir Hacıyevin həyat yoldaşı Zamirə Hacıyevanın həbs ediməsi ilə bağlı məlumatlar tam yalandır. Zamirə Hacıyeva həbs ediməyib, o xaricdədir". Bu barədə Cahangir Hacıyevin vəkili Aqil Layıcov Amerikanın Səsinə bildirib.
Vəkil eyni zamanda Zamirə Hacıyeva barəsində həbs qətimkan tədbiri seçilməklə bağlı məhkəmənin qərarının olub-olmaması barədə məlumatsız olduğunu bildirib.
Xatırladaq ki, bir sıra yerli KİV-lər, o cümlədən sosial şəbəkələr Zamirə Hacıyevanın həbs olunması barədə Nərimanov Rayon Məhkəməsinin iyunun 1-də qərar çıxardığnı yazıb. Onun həbsi barədə təqdimatı isə Baş prokurorun birinci müavini Rüstəm Usubov tərəfindən verildiyi bildirilir.
KİV-lər yazır ki, Zamirə Hacıyeva korrupsiyada – Beynəlxalq Bankdan sənəd təqdim etmədən kredit kartı götürməkdə və həmin kartdan müxtəlif post-terminallar və internet ödənişlər vasitəsilə ümumilikdə 18 min manat pul çıxarmaqda ittiham olunub.
Bakının Nərimanov rayon Məhkəməsinin qərarı ilə 2015-ci il dekabrın 5-də Azərbaycan Beynəlxalq Bankının İdarə Heyətinin keçmiş sədri Cahangir Hacıyev barəsində həbs qətimkan tədbiri seçilib. O, Cinayət Məcəlləsinin 179-cu (mənimsəmə) və 308-ci (vəzifə səlahiyyətlərindən sui-istifadə etmə) maddələri ilə ittiham olunur.