Azərbaycan
Prezidentinin Icra Aparatının ictimai-siyasət şöbəsinin müdiri Əli Həsənov
ölkədəki seçkiqabağı vəziyyətlə bağlı "Amerikanın səsi"nə müsahibə verib.
Müsahibənin tam mətnini təqdim edirik:
Sual:
Ölkədəki seçkiqabağı vəziyyəti necə qiymətləndirirsiniz?
Cavab:
Hal-hazırda seçki təşviqatının ən qızğın çağıdır. Bu il prezidentliyə 7 namizəd
qeydə alınıb. Və onların hər biri hazırda həm televiziya, radio və yazılı
mətbuat vasitəsilə, həm də özlərinin canlı ğörüşləri ilə seçicilərinə
platformalarını, planlarını, bu və ya digər ideyalarını çatdırırlar. Düşünürük
ki, seçkiyə qədər qalan 7-8 gündə bu iş bir az da dinamik şəkildə davam
etdiriləcək və oktyabrın 15-dək namizədlər nəzərdə tutduqları bütün qruplarla
görüşlərini keçirə biləcəklər.
Sual: Bu
günlərdə ATƏT Azərbaycanda seçkiqabağı vəziyyətlə bağlı aralıq hesabatı
açıqlandı. Sənədə reaksiyanız necədir?
Cavab:
Bu hesabatla tanış olmuşuq. Əlbəttə, burada bəzi neqativ hallar, çatışmazlıqlar
haqqında da məlumatlar var. Amma bu açıqlamalar hər həftə verilir. Məqsəd də
budur ki, sonrakı mərhələdə həmin problemlər aradan qaldırılsın. ATƏT-in
müşahidə missiyasının rəhbəri ilə Prezidentin İcra Aparatında görüşlər
keçirilib və bu hesabat müzakirə olunub. Hakimiyyət nümayəndələri hər kəsin
üzərinə düşən öhdəlikləri və vəzifələri bilirlər. Bütün neqativ halların aradan
qaldırılması üçün tapşırıqlar verilib, işlər gedir. Düşünürük ki, builki
seçkilərdə biz keçən seçkilərdən daha hazır vəziyyətdə, daha etimadverici bir
proses keçirə biləcəyik.
Sual:
Seçkinin obyektiv qiymətləndirilməsi üçün müşahidəçilərə lazımi şərait
yaradılacaqmı?
Cavab:
Bəli. Hazırda ölkədə 41 nəfər müşahidəçi var. Bunların 13-ü Bakıda, 28 nəfəri
regionlarda uzunmüddətli seçki müşahidəsini həyata keçirir. Oktyabrın 10-dan
13-dək ölkəyə gələcək digər 350 müşahidəçinin fəaliyyəti üçün lazımi şərait
yaradılır. Builki seçkiləri ATƏT də başda olmaqla, onun Varşava bürosu,
demokratik seçkilərlə bağlı digər qurumları, Avropa Komissiyası, Avropa Şurası
və Avropada seçki müşahidə edən digər qruplar, birlikdə 380-ə yaxın müşahidəçi
ilə izləyəcəklər. Bu müşahidəçilərin bütün məntəqələrdə tam, sərbəst müşahidə
aparması üçün lazımi şərait yaradılıb. Seçki məntəqələri açılandan – yəni səhər
saat 8-dən məntəqələr bağlanana vaxta, axşam saat 19.00-a qədər qədər, eləcə
də, ondan sonra, qutuların açılması, səslərin hesablanması və protokolların
hazırlanması da daxil olmaqla butun mərhələlərdə şəffaf seçki müşahidəsinə
icazə verilib. Düşünürük ki builki seçkilərdə şəffaflıq dərəcəsi əvvəlki
seçkilərdən qat-qat yüksək olacaq. Avropa müşahidəçilərindən başqa, müxtəlif
ölkələrin seçki institutları, o cümlədən beynəlxalq təşkilatlar və Qeyri-Hökümət
təşkilatları bütövlükdə Azərbaycana 700-ə yaxın seçki müşahidəçisi
göndərəcəklər.
Sual:
Gürcüstanda baş verən hadisələr də daxil olmaqla, beynəlxalq münasibətlərdə
nəzərə çarpan son gərginləşmənin Azərbaycandakı seçkilərə hər hansı təsiri ola
bilərmi?
Cavab: Əlbəttə, bunun
seşkilərə birbaşa və ciddi təsiri olmayacaq. Çünki regionda baş verən hadisələr
daha çox dövlətlərarası münasibətləri, beynəlxalq təhlükəsizlik və digər
məsələləri əhatə edir. Seçki isə Azərbaycanın daxilində həyata keçirilər prosedir.
Lakin istənilən halda regionda əgər narahatlıq varsa, seçici də, namizədlər də,
seçkiləri təşkil edən institutlar da, eyni zamanda seçki ilə aidiyyatı olan
digər dövlət qurumları da müəyyən prosesləri yaşamaq məcburiyyətində qalırlar.
Gürcüstanda baş verən hadisələrin stabilləşməsi və artıq tədricən bu
proseslərin nəticələrinin aradan
qalxması, düşünürük ki, seçkilərə də öz müsbət təsirini göstərəcək.