Avropa Şurası Yerli Hakimiyyətlər Konqresinin
Bürosu bazar ertəsi rəsmi Bakını martın 18-də Azərbaycan Konstitusiyasına dəyişikliklər
haqda referendumu təxirə salmağa çağırıb. Bu çağırış bazar ertəsi Konqresin
Bürosunun bəyanatında səslənib. Bununla yanaşı Venesiya komissiyasının və yerli
özünüidarəetmə haqda Avropa xartiyasının mövqeyinə istinad edilir.
Konqresin Bürosu qurumun prezidenti Jan Mihayelin fevralin 5-də səsləndirdiyi bəyanatı
xatırladır. O, Azərbaycan Konstitusiyasının 146-cı maddəsinə təklif edilən dəyişikliklər
və onun Azərbaycan tərəfindən 2002-ci ildə imzalanmış yerli özünüidarəetmə
haqda Avropa xartiyasının müddəaları ilə mümkün ziddiyyətlə əlaqədar baş nazir
Artur Rəsizadəyə narahatçılığını bildirmişdir.
Bəyanatda deyilir ki, 146-cı maddəyə təklif edilən dəyişikliklər hökumət tərəfindən
bələdiyyələrin fəaliyyətinə nəzarəti nəzərdə tutur ki, bu da ciddi narahatçılıq
və problemlər yaradır. Eyni zamanda, Büro referendumu təxirə salmağı və təklif
edilən düzəlişlər barədə Venesiya komissiyasının mövqeyini gözləməyi təklif
edir.