Moskvada Rusiya və
Azərbaycan prezidentləri Qafqazda son durum və Ermənistan-Azərbaycan
münaqişəsini müzakirə edib. Danışıqlar başa çatdıqdan sonra Rusiya prezidenti
Dmitri Medvedyev bildirib ki, Rusiya və Azərbaycanın qarşılıqlı fəaliyyəti
Qafqazda sülh və təhlükəsizliyin mühüm amillərindən biridir. “Mən Azərbaycan
prezidentinə Rusiyanın Cənubi Qafqazda təhlükəsizliyin təmin edilməsi məqsədilə
atdığı addımlar haqqında məlumat verdim”. Prezident İlham Əliyev isə deyib
ki, Azərbaycan Qafqazda narahatlıq doğuran vəziyyətin normallaşmasına yardım
etməyə hazırdır. “Bütün məsələlər sülh yolu ilə dialoq və qarşılıqlı hörmət
əsasında həll edilməlidir” -deyə o əlavə edib.
Dövlət başçıları Ermənistan-Azərbaycan
münaqişəsi ilə bağlı müzakirələri barədə də bəyanatla çıxış edib.
Cənab
Medvedyev bildirib ki, Rusiya bundan sonra da Qarabağ münaqişəsinin nizamlanması
prosesinə bacardığı qədər yardım edəcək. "Biz Azərbaycan və
Ermənistan prezidentləri arasında birbaşa danışıqların davam etdirilməsini
dəstəkləyirik. Rusiyanın mövqeyi əvvəlki kimi qalır: bundan sonra da bu çətin
məsələnin qarşılıqlı qəbul edilə biləcək həlli yolunun axtarışına maksimum
yardım göstərəcəyik. Biz problemlə bağlı əlaqələri ən yaxın zamanda davam
etdirəcəyik".
Cənab Əliyev isə Rusiyanın
münaqişəsinin həllində fəal roluna ümid etdiyini deyib. “Problemin
mürəkkəbliyinə baxmayaraq, bizə elə gəlir ki, bu gün bütün ölkələrin
maraqlarına cavab verəcək və beynəlxalq hüquq normalarına əsaslanacaq
nizamlanma üçün zəmin var". Azərbaycan və Rusiya
prezidentlərinin danışıqları son zamanlar Qafqazda baş verən hadisələr fonunda
yerli mətbuatın və ictimaiyyətin diqqət mərkəzindədir. Politoloqlar hesab edir
ki, Rusiya Qafqazdakı son hərbi-siyasi fəaliyyəti ilə Azərbaycanı təsiri altına
salmağa cəhd edir. Politoloq İlqar Məmmədovun
fikrincə, Rusiya Azərbaycanla münasibətlərdə heç zaman səmimi olmayıb. Bu
danışıqlar da nə enerji daşıyıcılarının dünya bazarına çıxarılmasında, nə də
Ermənistan-Azərbaycan münaqişəsinin həlli prosesində Azərbaycanın mənafeyinə
xidmət etmir. O güman edir ki, Rusiya
Azərbaycanın NATO-ya üzvlüyə can atmaqdan çəkinməyə çağırıb və bunun
müqabilində Dağlıq Qarabağ münaqişəsinin Azərbaycanın xeyrinə həllinə kömək
edəcəyinə vəd verib.
Yeri gəlmişkən bildirim ki,
elə bu gün Azərbaycan xarici işlər naziri Elmar Məmmədyarov Brüsseldə NATO
qərargahında fərdi əməkdaşlıq proqramının yerinə yetirilmə vəziyyəti ilə bağlı
26+1 formatında müzakirələr aparır. Politoloq İlqar Məmmədov hesab edir ki,
Azərbaycan nəhayətdə balanslı siyasət kursundan əl çəkib böyük hərbi alyanslara
qoşulmalıdır. Çünki belə olmazsa növbəti böhran vəziyyətində hərbi təzyiqə
məruz qala bilər. ABŞ-ın Azərbaycandakı səfiri
Enn Dersi də Qafqazda son vəziyyətlə bağlı fikrini açıqlayıb. Onun sözlərinə
görə, Xəzər təhlükəsizlik platforması inkişafda olan bir ideyadır və ABŞ bunu sadəcə müşahidə edir. “ABŞ Cənubi
Qafqaz və Xəzər bölgəsini tərəqqidə, inkişaf etmiş, sabit və dinc bir region
kimi görmək istəyir. Gürcüstanda baş verən olaylar sübut etdi ki, mövcud lokal
münaqişələrin həlli vaxtı gəlib çatıb. ABŞ vitse-prezidenti Dik Çeyni
Azərbaycanda olduğu vaxt deyib ki, hazırda Dağlıq Qarabağ münaqişəsinin həlli
üçün ən uyğun və həmişəkindən vacib bir vaxtdır. Cənab Çeyni Azərbaycana səfəri
zamanı ABŞ-ın Azərbaycanın ərazi bütövlüyünü dəstəklədiyini bir daha bəyan edib
və deyib ki, Dağlıq Qarabağ münaqişəsinin razılaşdırılmış həlli Azərbaycanın
ərazi bütövlüyü prinsipindən başlanmalıdır. Təbii ki, digər beynəlxalq və
diplomatik təcrübələr də nəzərə alınmalıdır. ABŞ bu sahədə hər zaman fəaliyyət
göstərib və bu kimi fəal təşəbbüsləri davam etdirəcək”. Səfir ABŞ-ın təsir bölgələri ifadəsinə inanmadığını
bildirib. ”Düşünürük ki, Qafqazda mövcud olan suveren və müstəqil dövlətlər öz
gələcəklərini seçmək hüququna malikdir və öz istiqamətlərini özləri təyin
edirlər. Bu isə ABŞ-ın uzunmüddətli mövqeyidir və bu mövqe dəyişilməz olaraq
qalır” -deyə o qeyd edib.
