Accessibility links

2018-ci ildə Azərbaycana 2 849,6 min insan gəlib


2018-ci ildə Azərbaycana dünyanın 196 ölkəsindən 2 849,6 min nəfər və yaxud 2017-ci il ilə müqayisədə 5,7% çox əcnəbi və vətəndaşlığı olmayan şəxs gəlib.

Bu barədə Report agentliyinin Dövlət Sərhəd Xidmətinə istinadən yaydığı xəbərdə deyilir.

Gələnlərin 30,9%-i Rusiya, 21,4%-i Gürcüstan, 10,2%-i Türkiyə, 8,5%-i İran, 3,3%-i Birləşmiş Ərəb Əmirlikləri (BƏƏ), 2,6%-i Səudiyyə Ərəbistanı, 2,4%-i İraq, 2%-i Ukrayna, 1,4%-i İsrail, 17,2%-i digər ölkələrin vətəndaşları, 0,1%-i isə vətəndaşlığı olmayan şəxslər olub.

2018-ci ildə Körfəz ölkələrindən (BƏƏ və İran istisna olmaqla) gələnlərin sayında daha çox artım müşahidə edilib. 2017-ci il ilə müqayisədə ölkəyə gələn Səudiyyə Ərəbistanı vətəndaşları 2,2 dəfə, Bəhreyn vətəndaşları 2 dəfə, Küveyt vətəndaşları 1,8 dəfə, Qətər vətəndaşları 1,6 dəfə, İraq vətəndaşları 7,9%, Oman vətəndaşları 7,4% artıb. İrandan gələnlərin sayında 33,7%, BƏƏ-dən gələnlərin sayında isə 8,3% azalma müşahidə edilib. Ümumilikdə Körfəz ölkələrindən 554,1 min nəfər gəlib və gələnlərin demək olar ki, hər beş nəfərindən biri bu ölkələrin vətəndaşları olub.

2017-ci ilə nisbətən Hindistandan gələnlərin sayı 2,7 dəfə, İsraildən gələnlərin sayı 2,6 dəfə, Misir, Türkmənistan və Cənubi Koreyadan gələnlərin sayı 1,7 dəfə, Çindən gələnlərin sayı isə 1,5 dəfə artıb.

2018-ci ildə Avropa İttifaqına üzv ölkələrdən gələnlərin sayı 6,7% artaraq 112,5 min nəfər, MDB ölkələrindən gələnlərin sayı 3,8% artaraq 1 044,2 min nəfər olub.

2018-ci ildə xarici ölkələrə gedən Azərbaycanvətəndaşlarının sayı əvvəlki illə müqayisədə 19,5% artaraq 4 908,1 min nəfər olub. Ölkə vətəndaşlarının 33,6%-i İrana, 29,2%-i Gürcüstana, 18,9%-i Rusiyaya, 12,3%-i Türkiyəyə, 1,4%-i Ukraynaya, 0,9%-i BƏƏ-yə, 3,7%-i isə digər ölkələrə səfər edib. Səfər edənlərin 65,3%-i kişilər, 34,7%-i isə qadınlar olub.

Bu dövrdə İrana gedən Azərbaycan vətəndaşlarının sayı 71,8%, Gürcüstana gedənlərin sayı 4,2%, Türkiyəyə gedənlərin sayı 0,9%, Rusiyaya gedənlərin sayı 0,3% artıb.

2018-ci ildə xarici ölkələrə səfər etmiş ölkə vətəndaşlarının 81,4%-i dəmir yolu və avtomobil, 17,8%-i hava, 0,8%-i isə su nəqliyyatından istifadə edib.

XS
SM
MD
LG