ABŞ prezidenti Quantanamo məhbəsinin bağlanması üçün əlindən gələni edəcəyini deyb.
CNN kanalına müsahibəsi zamanı Barak Obama bildirib ki, həbsxana cihadçılar və ekstremistləri təşviq edir. O, ABŞ-ın bu cəza müəssisəsinə milyonlarla dollar sərf etdiyini və bunun Amerika dəyərlərinə zidd olduğunu deyib.
Dünən ABŞ-ın Müdafiə Nazirliyi 4 əfqan məhbusun azad edildiyini bəyan edib.
Quantanamoda 2009-cu ildə prezidentin hamiyyətə gəldiyi vaxt 242 məhbus saxlanılırdı. Hazırda onların sayı 132 nəfərdir.
Məhbusların bir çoxu azadlığa buraxılmalıdır. Lakin vətənlərinə dönə bilmədikləri üçün onların sərbəst buraxılması yubadılır.
Cəza müəssisəsində saxlanılanların yarıdan çoxu yəmənlidir.
Quantanamo 2002-ci ildə, Əl-Qaidənin 11 sentyabr terror aksiyalarından sonra açılıb. İnsan hüquqları müdafiəçiləri dəfələrlə ABŞ-ı insanları ittihamsız və ağır dindirilmə şərtləri altında saxladığına görə tənqid edib.
