Birləşmiş Ştatların Washington Post qəzeti Rusiya casusu Anna Çapmanın atasına etdiyi telefon zənginin Birləşmiş Ştatların kəşfiyyat rəsmilərinin onun və ABŞ-da agent kimi işləyən digər 9 rusiyalı casusun həbsini sürətləndirməsinə səbəb olduğunu yazır. Washington Post-un bu gün adını açıqlamadığı mənbəyə istinadən yazdığına görə, Çapmanın Moskvada yaşayan və sabiq DTK işçisi olmuş atasına iyun ayının 26-da etdiyi zəng izlənilib. Həmin söhbətdə Çapman atasına ondan şübhələnildiyini deyib.
Qəzet ABŞ rəsmilərinin Çapman və digər 9 nəfəri iyun ayının ortalarında həbs etməyi planlaşdırdıqlarını yazır. Lakin casuslardan biri olan Riçard Mörfinin Moskvaya səfərdən sonra ABŞ-a qayıtmayacağı ehtimalı Amerika rəsmilərini cəld hərəkət etməyə vadar edib.