Prezident Vladimir Putin Kyivi Rusiya ilə sərhəd Kursk bölgəsində mülki və yaşayış məntəqələrini raket atəşinə tutmaqda təqsirləndirib.
Avqustun 7-də hökumət iclasının yayımı zamanı çıxış edən Putin hərbi əməliyyatı “genişmiqyaslı təxribat” adlandırıb.
Bir gün əvvəl Kursk vilayətinin qubernatoru səlahiyyətlərini icra edən Aleksey Smirnov Moskvanın Ukraynanı yüzlərlə əsgərlə sərhəd bölgəsindəki mövqelərinə hücumda ittiham etməsindən bir gün sonra Sudja şəhəri yaxınlığında Ukraynaya məxsus pilotsuz təyyarənin hücumu nəticəsində iki nəfərin öldüyünü bildirib.
“Kyiv rejimi növbəti irimiqyaslı təxribata əl ataraq mülki binaları, yaşayış evlərini, təcili yardım maşınlarını müxtəlif növ silahlardan atəşə tutmağa başlayıb” – deyə, Putin bildirib.
Onun iddiasını müstəqil şəkildə yoxlamaq mümkün olmayıb.
Aleksey Smirnov Telegram-da verdiyi mesajda sərhəddən təqribən 10 kilometr aralıda yerləşən Sudja şəhərində Ukraynaya məxsus pilotsuz təyyarənin hərəkətdə olan təcili yardım maşınına zərbə endirdiyini və iki nəfərin öldüyünü bildirib.
Smirnov bildirib ki, sürücü və feldşer ölüb, təcili yardım həkimi isə yaralanıb.
Kyiv Smirnovun iddiasına münasibət bildirməyib, bunu da müstəqil şəkildə təsdiqləmək mümkün olmayıb.
Smirnov həmçinin Rusiya Müdafiə Nazirliyinin ötən gün 11 tank və 20-dən çox zirehli döyüş maşınının dəstəklədiyi 300-ə qədər əsgərin Kursk bölgəsinə keçərək Nikolayevo-Darino və Oleşnya yaşayış məntəqələri yaxınlığındakı Rusiya mövqelərinə hücum etdiyini bildirdikdən sonra sakinləri qan verməyə çağırıb.
Ukrayna bu iddiaya münasibət bildirməyib, Moskva isə onun qüvvələrinin artilleriya atəşi, döyüş təyyarələri və pilotsuz təyyarələrdən istifadə etməklə hücumları dəf etdiyini, Ukrayna qüvvələrinin itki verdikdən sonra geri çəkildiyini bildirib.
Lakin avqustun 7-də kremlpərəst blogerlər Ukrayna qüvvələrinin Sudja rayonunda Nikolayevo-Darino və Sverdlikovonu işğal etdikləri barədə məlumat yayıblar.
Blogerlər Ukrayna əsgərlərinin bir gün əvvəl Sudjaya daxil olduğunu və Qonçarovka və Oleşna kəndlərini nəzarətə götürməyə çalışdıqlarını bildiriblər.
Kyiv də müstəqil şəkildə təsdiqlənə bilməyən bu xəbərlərə münasibət bildirməyib.
Ayrı-ayrılıqda, Rusiya Müdafiə Nazirliyi hava hücumundan müdafiə qüvvələrinin avqustun 7-də səhər saatlarında Ukraynanın 4 regionunda buraxdığı 11 pilotsuz təyyarəni vurduğunu bildirib.
“Növbəti hava hücumundan müdafiə sistemləri Belqorod vilayətində üç, Kursk vilayətində dörd, Voronej vilayətində iki, Rostov vilayətində iki pilotsuz uçan aparatı ələ keçirib və məhv edib” – deyə, nazirliyin Telegram-dakı mesajında deyilir.
Bu arada Ukrayna hava hücumundan müdafiə qüvvələrinin Rusiyanın yeddi regionunda atdığı 30 pilotsuz təyyarənin hamısını vurduğunu bildirib.
Bütün Rusiya pilotsuz təyyarələri "Kyiv, Xmelnitski, Vinnitsa, Nikolayiv, Xerson, Xarkiv və Çerkassı vilayətləri üzərində vurulub" – deyə, Hərbi Hava Qüvvələrinin komandanı, general Nikolay Oleşuk bildirib.
Kyivdə vurulan dronlardan düşən tullantılar ayağından qəlpə yarası alan şəxsə dəyib.
Avqustun 7-də Kyiv regional hərbi administrasiyasının rəhbəri Ruslan Kravçenko bildirib ki, bütün vilayətdə onlarla yaşayış evi və təsərrüfat binası dağıntılar nəticəsində zədələnib və əlavə edib ki, paytaxta hücum 8 saatdan çox davam edib.
Forum