Bu yaxınlarda Təbrizdə nəşr olunan “Tarhe no” qəzetində bir məqalədə Azərbaycan türklərinin və qadınların aşağılanmasına etiraz olaraq Təbriz və Urmiyə də daxil olmaqla İran Azərbaycanının bir sıra şəhərlərində etiraz aksiyaları keçirilib. Bu aksiyaların polisin sərt müdaxiləsi ilə dağıdıldığı, bəzi fəalların saxlandığı bildirilir. İsveçdə yaşayan güneyli fəal Saleh Kamrani Amerikanın Səsinin “Amerika icmalı” proqramında müsahibədə İran Azərbaycanında son etiraz aksiyaları və milli fəalların həbsindən danışıb.
“İran konstitusiyasının 27-ci maddəsində deyilir ki, insanların silahsız nəyə isə etraz etdiyi halda, polisin əsas vəzifəsi onların təhlükəsizliyini təmin etməkdən ibarətdir. Amma buna baxmayaraq, İran polisi azərbaycanlılara qarşı gücdən istifadə edir.”-Saleh Kamrani
Saleh Kamraninin sözlərinə görə, etiraz nümayişlərinin keçirildiyi gün bir çox milli fəalın həbsi ilə bağlı məlumatlar verilib. Bunların bir hissəsi azad edilib, lakin hazırda nə qədər adamın saxlandığı və onların durumu haqda dəqiq məlumat yoxdur. “Bir çox fəallarımız tutuldu. Əhər, Təbriz, Ərdəbil, Xoy, Zəncan, Tehran kimi bir çox şəhərlərimizdə çoxlu fəallarımız tutuldu. Onların bir çoxu az müddətdən azadlığa buraxıldı, bir sıra fəallar ağır girov əvəzində buraxıldılar. Nə qədər fəalın hazırda saxlandığını demək çətindir, amma o üm gün ərzində 100-dən çox fəal tutulub.”
Təbriz və Urmiyədə etiraz aksiylarının polis tərəfindən ciddi müdaxilə edildiyi və yüzlərlə vətəndaşın iştirak etdiyi mitinqi dağıtdığı bildirilir. Saleh Kamrani deyib ki, azərbaycanlı milli fəalların silahsız və dinc aksyalar keçirməsinə baxmayaraq, İran polisi nümayişçilərə qarşı güc tətbiq edir, ifrat gücdən istifadə edir. “İran konstitusiyasının 27-ci maddəsində deyilir ki, insanların silahsız nəyə isə etraz etdiyi halda, polisin əsas vəzifəsi onların təhlükəsizliyini təmin etməkdən ibarətdir. Amma buna baxmayaraq, İran polisi azərbaycanlılara qarşı gücdən istifadə edir.”
"Əhər, Təbriz, Ərdəbil, Xoy, Zəncan, Tehran kimi bir çox şəhərlərimizdə çoxlu fəallarımız tutuldu. Onların bir çoxu az müddətdən azadlığa buraxıldı, bir sıra fəallar ağır girov əvəzində buraxıldılar."-Saleh Kamrani
Saleh Kamrani deyib ki, İran hökumət nümayəndələri səviyyəsində, ya da hökumət qurumları tərəfindən rəsmi açıqlama verilməsə də, bəzi vilayət rəsmiləri və qubernatorlar ayrı-ayrı bəyanatlarla çıxış edib.
Güneyli milli fəal Azərbaycanlıların alçadılması və təhqir olunması hallarının əvvəllər də baş verdiyini və bu halların təkrar oluna biləcəyini gözlədiyini deyib. Onun sözlərinə görə, bu hallar İran hökumətinin etnik azlıqlara qarşı yürütdüyü ayrı-seçkilik siyasətinin təzahürüdür. “İran hakimiyyətinin rəftarlarında və Azərbaycan millətini, Azərbaycan türklərini hər zaman təhqir edən irqçi güclər tərəfindən bir müsbət dəyişikliyin olacağını gözləmirəm. Azərbaycan türklərinə qarşı təhqirlər davam edir.”
