Accessibility links

Avropa Məhkəməsi 22 Azərbaycan vətəndaşının şikayəti üzrə qərarını açıqlayıb


Avropa İnsan Hüquqları Məhkəməsi (AİHM) 22 Azərbaycan vətəndaşının şikayəti ilə bağlı qərarını açıqlayıb.

Bu barədə məhkəmənin rəsmi səhifəsində məlumat yayılıb.

Məhkəmə 22 şikayəti birləşdirərək eyni icraatda baxıb və nəticədə bir qərar qəbul edib.

Arif İslamzadə və digərləri ilə bağlı iş məhkəmə qərarlarının icra edilməməsi ilə bağlıdır. Qərarda göstərilir ki, şikayətçilər ədalətli məhkəmə araşdırması və mülkiyyət hüquqlarının pozuntusunun tanınmasından ötrü AİHM-ə üz tutub.

Şikayətçilər Arif Islamzadə, Almas Abdullayeva, Məzahir Bağırov, Namiq Hacıyev, İsa Rüstəmov, Rəna Qasımova, Söhbət Qayıbov, Akif Xəlilov, Əziz Ağasıbəyov, Elman Şahmuradov, Cümşüd İsmiyev və Nəcəfəli Babayevdir.

Bundan başqa, Təbriz Həsənov, Şahlar Quliyev, Tahir Məcidov, Daşdəmir Əliyev, Leyla Məmmədova, Xaləddin Məmmədov, Kamil Nəcəfov, Məhəmməd Abbasov, Səlbi Baxşəliyeva və Ziyadxan Əhmədov da şikayətçilər arasında yer alır.

Onların müxtəlif vaxtlarda mülkiyyət hüquqlarının pozulduğu bildirilir. Məhkəmə qərarında həmin pozuntuların detalları barədə bilgi verilmir.

Yerli məhkəmələr həmin mülkiyyət mübahisələri barədə qərarlar verib, ancaq həmin qərarlar icra edilməyib. 22 vətəndaş elə buna görə 2010-14 cü il aralığında AİHM-ə üz tutub.

Şikayətçilər məhkəmədən onların Avropa Konvensiyasının 6-cı (Ədalətli məhkəmə araşdırması) və 1 Saylı Protokolunun 1-ci (Mülkiyyət hüququ) maddəsinin pozuntusunun tanınmasını və onlara dəymiş zərərə görə kompensasiya ödənilməsini istəyirlər.

Avropa İnsan Hüquqları Məhkəməsi şikayətləri haqlı sayıb. Qərar 3 aydan sonra qüvvəyə minəcək.

Hökumət şikayətçilərə ümumilikdə 87 min 950 avro təzminat ödəməlidir. Qərara görə, hökumət bundan başqa, hüquqi məsrəflərdən ötrü də ümumilikdə 3 min avro ödəməlidir.

Şikayətçiləri Avropa İnsan Hüquqları Məhkəməsində Əliməmməd Nuriyev, Ruslan Mustafazadə və Akif Əliyev təmsil edib.

Fikirləriniz

Show comments

XS
SM
MD
LG