BMT-nin Livanın cənubundakı sülhməramlı qüvvələrinin bildirdiyinə görə, İsraillə Livan arasındakı sərhəddə ölümlə nəticələnən qarşıdurmanın səbəbi İsrailin ərazidəki ağacları kəsməsi olub. UNİFİL-in açıqladığı bugünkü bəyanatda deyilir ki, İsrail hərbi qüvvələri dünən BMT qüvvələrinin iki ölkə arasındakı “Mavi Xətt” zonasında İsrailə məxsus ərazidə ağacları kəsməyə başlayarkən atışma baş vermişdir. Qarşıdurma zamanı iki Livan, bir İsrail əsgəri və bir jurnalist qətlə yetirilmişdir.
Livan rəsmiləri İsrailin hava və quru qüvvələrinin sərhəddəki Adaisseh şəhərindən hücuma keçdiyini və nəticədə 2 Livan əsgərinin və Əl-Əkbər qəzetinin jurnalistinin öldüyünü bildrimişlər. İsrail isə Livandan edilən snayper hücumunun bir yüksək rütbəli zabiti öldürdüyünü, digərini isə ağır yaraladığını deyir.