Birləşmiş Millətlər Təşkilatının Təhlükəsizlik Şurası Ümumdünya Ərzaq Proqramının İsrailin hücumları nəticəsində əhalisinin yarısı aclıqdan əziyyət çəkdiyini bildirdiyi Qəzza zolağına genişmiqyaslı yardım çatdırılmasını asanlaşdırmaq məqsədi daşıyan qətnaməyə səsverməni ABŞ-ın dəstəyini almaq üçün çərşənbə günü təxirə salıb.
Bundan əvvəl də bazar ertəsinə planlaşdırılan səsvermə diplomatların Vaşinqtonun qəbul edə biləcəyi kompromisi əldə etmək səbəbindən dəfələrlə təxirə salınıb.
15 ölkədən ibarət şurada ərəb nümayəndəsi kimi qətnamə layihəsini Birləşmiş Ərəb Əmirlikləri hazırlayıb və danışıqlara rəhbərlik edir.
Birləşmiş Ərəb Əmirliklərinin səfiri Lana Nusseybəh jurnalistlərə "Müəllif olaraq, biz paytaxtlar arasında qəbul ediləcək mətndəki tələblərə nail olmaq üçün çox yüksək səviyyəli müzakirələrin fərqindəyik və onların bir hissəsiyik. Bu qətnamənin əsas məqsədi ən çox ehtiyacı olan insanların olduğu yerlərə müsbət təsir göstərmək olub" deyib.
"Əlavə diplomatiyaya bir az yer vermək müsbət nəticələr verə bilər" - deyə, o bildirib və əlavə edib ki, belə olmazsa, şura cümə axşamı səs verəcək.
Qətnamə layihəsi münaqişə tərəfləri "birbaşa marşrutlarla Qəzza zolağının bütün Fələstin mülki əhalisinə genişmiqyaslı humanitar yardımın dərhal, təhlükəsiz və maneəsiz çatdırılmasına icazə verməsini, asanlaşdırmasını və imkan yaratmasını" tələb edir.
Layihə həmçinin yardımın təhlükəsiz və maneəsiz çatdırılmasına imkan vermək istiqamətində təcili addımlar atmaq üçün "hərbi əməliyyatların təcili dayandırılmasına" çağırır.
Diplomatlar bildiriblər ki, layihədəki bu son hissə amerikalılar üçün böyük bir sıxışma nöqtəsidir.
Mətn qəbul olunsa, Qəzzaya çoxsaylı giriş məntəqələri vasitəsilə yardım daşınmasının humanitar xarakterini təsdiqləmək üçün BMT-nin monitorinq mexanizminə də icazə veriləcək.
"Birləşmiş Ştatlar Qəzzadakı mülki əhaliyə daha çox humanitar yardım göstərmək, o cümlədən Rəfah və Kərəm Şalom sərhəd keçid məntəqəsini humanitar yardımçılar üçün açmaq səylərində ön plandadır" - deyə, ABŞ Dövlət Departamentində keçirilən mətbuat konfransında Dövlət katibi Antoni Blinken bildirib.
O, "Biz qətnamənin tələb etdiyi kimi, əslində bu səyləri irəli aparacağından və ya humanitar yardımın çatdırılmasına zərər verə bilməyəcəyindən, onu daha da mürəkkəbləşdirməyəcəyindən əmin olmaq istəyirik" - deyə, əlavə edib.
Forum