Rusiya baş naziri Vladimir Putin xəbərdarlıq edib ki, əgər ABŞ START müqaviləsini ratifikasiya etməsə, onda Rusiya nüvə arsenalını artıracaq. CNN telekanalına müsahibə verən cənab Putin deyib ki, yeni müqavilə ABŞ-ın öz maraqlarına xidmət edir. Onun sözlərinə görə ABŞ Senatının bunu nəzərdən qaçırması “səfehlik” olardı. Baş nazir həmçinin söyləyib ki, əgər ABŞ Rusiya sərhədlərinə yaxın ərazidə anti-raket sistemi yerləşdirsə, onda Rusiya öz təhlükəsizliyini təmin etmək məcburiyyətində qalacaq. Vladimir Putin ABŞ prezidenti Barak Obamaya ABŞ-Rusiya münasibətlərində ritorikanı mülayimləşdirdiyinə görə təşəkkür edib. Cənab Putin müsahibədə Koreya yarımadasındakı durum və İranın nüvə proqramı haqda da öz fikirlərini ifadə edib.
Vladimir Putin ABŞ-ı START müqaviləsini təsdiq etməyə çağırır
