Azərbaycan Mərkəzi Bankı (AMB) son 12 ayda manatın üçüncü dəfə devalvasiyası barədə şayiələri təkzib etdiyi vaxtda milli valyuta son iki gündə dollara və avroya nisbətdə 15-20 qəpik dəyərdən düşüb.
"Manatın yeni devalvasiyasının olacağı barədə şayiələrin əsası yoxdur. Manatın dollara nisbətən məzənnəsi yeni məzənnə siyasəti - tələbat və təklif əsasında müəyyən edilir. Mərkəzi Bank valyuta satışını hərraclar vasitəsilə həyata keçirir", AMB-nin yaydığı bəyanatda deyilir.
"Bundan əlavə, bank sektorunun maliyyə davamlılığının gücləndirilməsi, o cümlədən əmanətlərin sığortalanması sisteminin təkmilləşdirilməsi üzrə işlər aparılır", sənəddə deyilir.
Lakin AMB-nin bəyanatlarına baxmayaraq, manatın dəyərdən düşməsi davam edir.
Əgər yanvarın 7-də Bakıda valyutadəyişmə məntəqələri və banklar dolları 1,66-1,68 manata, avronu isə 1,82 manata satırdılarsa günün sonunda xarici valyuta 5-7 qəpik bahalaşıb.
Yanvarın 8-də səhərdən dollar 1,82 manata satılır,1,78 manata alınır.
Avro demək olar ki, 2 manata satılır, 1,85 manata alınır.
Beləliklə, dekabrın 21-də baş vermiş ikinci devalvasiyadan sonra avro və dollar 19%-dən çox bahalaşıb.