Azərbaycan Diplomatik Akademiyası "Azərbaycanlılar
və amerikalılar: bir-birimizi necə görürük" mövzusunda beynəlxalq konfrans
keçirib. Konfransda Azərbaycan xarici işlər nazirinin müavini, Diplomatik
Akademiyanın rektoru Hafiz Paşayev, Washington Times, Los Angeles Times, The
New Republic, Newsweek qəzetlərinin müxbirləri, elektron mətbuatın
nümayəndələri, beynəlxalq şərhçilər, yerli mətbuatın təmsilçiləri və
politoloqlar iştirak edib.
Tədbirdə xarici siyasətin formalaşdırılmasında
mətbuatın rolu, ABŞ-da keçiriləcək prezident seçkiləri və onun dünya siyasətinə təsiri,
amerikalıların Azərbaycana və azərbaycanlıların Amerikaya münasibəti ilə bağlı
müzakirələr keçirilib.
Diplomatik Akademiyanın rektoru Hafiz Paşayev bildirib ki, iki ölkə arasında münasibətlərin inkişafında medianın rolu mühümdür. Onun fikrincə, Qafqazda hadisələrin gərgin məcraya qədəm qoyduğu bir dövrdə belə müzakirələrə daha ciddi ehtiyac hiss edilir.
Xarici İşlər Nazirliyinin mətbuat xidmətinin
rəhbəri Xəzər İbrahim deyib ki, medianın xarici siyasətə təsiri məsələsi dövlət
media münasibətlərinin tərkib hissəsidir. Onun sözlərinə görə, dövlət medianın
inkişafını dəstəkləməlidir. "Çünki inkişaf etmiş media olmadan dövlətin
siyasəti yayıla bilməz. Media dövlətin mesajlarını cəmiyyətə və beynəlxalq
aləmə çatdırır. Eyni zamanda, ictimaiyyətin və beynəlxalq aləmin reaksiyalarını
dərc edir. Bu məlumatlar dəqiq və ədalətli olmalıdır. Belə ki, dövlət siyasəti
bu reaksiyalara uyğun nizamlanır. Bu zəncirvari bir fəaliyyətdir və zəncir heç
zaman qırılmamalıdır".
Day.az saytının rəhbəri Elnur Baimov alternativ
mətbuatın rolunu qeyd edib. Onun sözlərinə görə, rus-gürcü müharibəsi zamanı
ruslar Gürcüstanın bütün saytlarını dayandırıb. "Belə şəraitdə day.az
saytı Gürcüstanın xəbərlərini yaydı. Ermənistanda fövqəladə vəziyyət elan
ediləndə isə biz erməni müxalifətinin fikirlərini yayırdıq. Bu baxımdan
alternativ medianın rolu mühümdür".
Washington Times qəzetinin yazarı Andrew Breitbart
deyib ki, Rus-Gürcü müharibəsi ilə bağlı ABŞ-da məlumat qıtlığı olub. Məqalə
yazanda ingilis dilli bir sayt tapa bilmirdik. Hətta məlumatı istinad etməyə
belə mənbə tapılmırdı. Onun fikrincə, Cənubi Qafqazdakı son hadisələr bir daha
bu regionda alternativ medianın inkişafına diqqətin artırılmasının vacibliyini
önə çıxarıb.
"ABŞ-da alternativ fikrin cəmiyyətə çatdırılmasında hətta
Hollivud filmlərindən istifadə edilir. Azərbaycanda çoxsaylı peyk antenləri
görürəm. Bu insanların alternativ fikri daha çox dəstəklədiyinə işarədir. ABŞ
dünyada alternativ fikrin yayılmasında məsuliyyət daşıyır. Ona görə də, ABŞ
dünyanın bu hissəsində alternativ fikrin inkişafına kömək etməlidir. Bu bölgədə
birtərəfli fikirlilikdən çoxfikirliliyə keçilməsinə yardım edilməlidir".
Los Angeles Times qəzetinin yazarı Gregory Rodriguzerin
fikrincə, 11 sentyabr hadisələrindən sonra xarici ölkələrdə işləyən ABŞ
jurnalistlərinin sayı azalıb. "Hazırda ABŞ-da kabel televiziyaları
xəbərlər proqramlarının 4 faizini, aparıcı televiziyalar isə 8 faizini xarici
xəbərlərə həsr edir. Təhlükələrə gəldikdə isə diqqəti daha çox islam, terrorizmi,
qloballaşma, Çinin böyüməsi cəlb edir. Soyuq müharibədən sonra amerikalıların
xarici xəbərlərə marağı azalıb".
Onun sözlərinə görə, ABŞ mətbuatında Azərbaycanla bağlı
çox az məlumat dərc edilir. "Dərc edilən xəbərlər isə o qədər mürəkkəb
olur ki, oxucu bəzən bilmir, xəbər Sarayevadandır, yoxsa Azərbaycandan".
MichaelTotten.com saytının rəhbəri Michael Totten
bildirib ki, 70-ci illərin əvvəlində medianın təsiri ABŞ-ın Vyetnamdan
qoşunlarını çıxarmasına səbəb olub. "Medianın təsiri ilə ictimaiyyət
hökumətin siyasətinə qarşı çıxıb. Ancaq İraq müharibəsində belə olmadı.
Məlumatlar birtərəfli verildi və media ictimai rəyə təsir edə bilmədi. Ona görə
də, ABŞ qoşunlarının İraqdan nə vaxt çıxacağı hələ də bəlli deyil. Nə qədər ki,
media ictimai rəyə təsir edəcək dərəcədə məlumatlar dərc etməyəcək, o vaxtadək İraqda vəziyyət dəyişməyəcək".
Cənab Totten ABŞ mətbuatında Azərbaycanla bağlı
məlumatların dərc edilmədiyini deyib."Bu onunla bağlıdır ki, xüsusilə
Azərbaycan tərəfindən ABŞ mediasına məlumat verilmir. Siz məlumat versəniz ABŞ
ictimaiyyətinin rəyini qazana bilərsiniz və ictimai rəy hökumətə təsir edər.
ABŞ-da erməni lobbisi ilə bağlı məlumatlar dərc edilir, ancaq Azərbaycan
lobbisinin olub-olmaması barədə təsəvvür belə yoxdur".
Jurnalist Gürcüstanın Rusiya ilə münaqişədə ictimai
rəyə çıxdığını deyib. "Ancaq Siz ictimai rəyə çıxmaq üçün Rusiya ilə
qarşıdurmaya getməyin. Çünki ABŞ ictimaiyyəti Dağlıq Qarabağ münaqişəsində
Rusiyanın hansı rol oynadığını bilmir. Çünki daxildən bununla bağlı mediaya hər
hansı məlumat verilmir. Bu münaqişə ilə bağlı nə baş verdiyini ABŞ ictimaiyyəti
bilmir. Ancaq Rus-Gürcü müharibəsindən sonra ABŞ ictimaiyyətini regionla bağlı
məlumatlar daha çox maraqlandırmağa başlayıb. Bu məlumatların verilməsi
Azərbaycan üçün daha böyük əhəmiyyət kəsb etməlidir" - deyə o qeyd edib.
Jurnalist Kamal Əli Azərbaycan hökumətinin mətbuatla işləmədiyini deyib. Onun sözlərinə, xarici işlər nazirliyindən başqa, digər nazirliklər, o cümlədən prezidentin xidməti media ilə iş qura bilməyib. Bu səbəbdən də o məcazi mənada aeroport jurnalistikasının inkişaf etdiyini xatırladıb. Yəni jurnalistlər dövlət rəsmilərindən məlumat almaq üçün onların səfərə nə vaxt gedəcəyini izləməli olur.
