ABŞ prezidenti Barak Obama bu gün Amerikanın İraqdakı döyüş missiyasının başa çatdığını elan edib. Cənab Obama deyib ki, sabiq prezidet Corc Buşun elan etdiyi İraqın Azadlıq Əməliyyatı avqust ayının 31-də başa çatdırılacaq. Beləliklə 90 min əsgərdən ibarət qüvvə vətəninə qayıdacaq. İraqda qalacaq 50 min nəfərlik qüvvə İraq əsgərlərinə təlimlər verəcək və əks-terror əməliyyatlarında onlara yardım göstərəcək. ABŞ qüvvələri 2011-ci ilin sonunadək İraqı tamamilə tərk etməlidir. Prezident Obama çıxışını Gorgiya ştatının Atlanta şəhərində əlil müharibə veteranları qarşısında edib.