Böyük İyirmilik bazar günü virtual zirvə göşü zamanı COVID-19 peyvəndi ilə hər kəsin təmin edilməsi səylərini əsirgəməyəcəyinə söz verib.
Quruma üzv ölkələr COVID-19 vaksinləriı, testləri və müalicəsi ilə əlaqədar olaraq hamı üçün əlverişli və bərabər hüquqlu olmasını təmin etmək səylərinin davam etdiriləcəyini deyib.
Ağ Evin mətbuat katibinin verdiyi açıqlamaya görə, prezident Donald Tramp bazar günü keçirilən görüş zamanı “işçiləri və ailələri təşviq edən siyasətlərin vacibliyini dilə gətirib”.
"O, ABŞ-da və dünyada qadınların gücləndirilməsi və onlar üçün investisiya yatırma sahəsində qazanılan tarixi nailiyyətləri də müzakirə edib və bütün ölkələri daha çox iş görməyə çağırıb" - deyə, açıqlamada bildirilib.
Bu ayın əvvəlində keçirilən prezident seçkilərində məğlub olduqdan sonra ictimaiyyət qarşısında çox da görünməyən ABŞ prezidenti Donald Tramp şənbə günü olduğu kimi bazar günü də iclasa qatılıb.
Səudiyyə Ərəbistanının kralı Salman şənbə günü görüşü üzv ölkələri dünyanı əlçatan vaksinlərlə təmin edilməsində əminliyə çağırışla açıb.
Pandemiya və iqtisadi tənəzzül sənaye baxımından inkişaf etmiş ölkələrin ikigünlük virtual zirvə görüşünün ilk günündə üstünlük verilən məsələlər olub.
Salman görüşü açarkən birlikdə problemlərin həlli, ümid və güvən mesajı vermək borcumuzdur deyib.
John Hopkins Universitetinin məlumatına görə, qlobal koronavirus yoluxmaları 58 milyona yaxınlaşıb və dünya miqyasında COVID-19-dan ölümlərinin sayı 1,4 milyona çatıb.
G-20 liderləri pandemiyanın zəngin və yoxsullar arasındakı uçurumu daha da dərinləşdirəcəyindən narahatdır.
Bununla mübarizə üçün Avropa İttifaqı, Ümumdünya Səhiyyə Təşkilatını vaksinlərin, testlərin və müalicənin inkişafını və paylanmasını sürətləndirmək üçün qlobal bir layihə olan COVID-19 Tools Accelerator-a çıxış üçün 4,5 milyard dollar məbləğində yardıma çağırıb.
Almaniya kansleri Angela Merkel təxminən 593 milyon dollar vəd edib. Rusiya Prezidenti Vladimir Putin Rusiyanın Sputnik V peyvəndini təklif edib, Çin isə peyvənd sahəsində əməkdaşlığa çağırıb.
Trampın virtual görüşü tərk etməsindən sonra toplantıya qatılan ABŞ maliyyə naziri Stiv Mnuçin G-20-nin əsas nailiyyətinin Maliyyə Nazirliyinin 7 aylıq borc xidmətinin dayandırılması təşəbbüsünün pandemiyaya cavab kimi istifadə etməsi olduğunu deyib. Təşəbbüs dünyanın ən yoxsul ölkələrinə gələn ilin ortalarına qədər pandemiyanın fəsadlarının aradan qaldırılmasına yardım edəcək.
Sammit ilk dəfədir ki, COVID-19 pandemiyası səbəbindən onlayn keçirilir.
G-20-yə üzv ölkələr Argentina, Avstraliya, Braziliya, İngiltərə, Kanada, Çin, Fransa, Almaniya, Hindistan, İndoneziya, İtaliya, Yaponiya, Meksika, Rusiya, Səudiyyə Ərəbistanı, Cənubi Afrika, Cənubi Koreya, Türkiyə, Amerika Birləşmiş Ştatları və Avropa İttifaqıdır.
