Somalinin mərkəzində intiharçının izdihamlı restoranda törətdiyi bomba partlayışı zamanı 16 nəfərin həlak olduğu bildirilir. Partlayış nəticəsində onlarla insan yaralanıb.
Bələdveyn şəhərində baş vermiş hücuma görə məsuliyyəti Əl-Şəbəb yaraqlı qrupu öz üzərinə götürüb. Qrupun açıqladığı bəyanatda bomba hücumunun əsas hədəfinin ölkədə yerləşdirilmiş Efiopiya və Cibuti əsgərlərinin olduğu bildirilib.
Əl-Şəbəb hücum zamanı Efiopiyanın 13 əsgəri də daxil olmaqla, 20 nəfərin ölümülə nəticələndiyini bildirib.
Əl-Qaidə ilə əlaqəsi olan Əl-Şəbəb qrupu özünün bildirdiyi kimi, Somalidə xarici ölkə əsgərlərinin yerləşdirilməsinə etiraz olaraq silsilə hücumlar həyata keçirib. Qrup keçən ay Keniyada alış-veriş mərkəzində 67 adamın ölümülə nəticələnmiş hücumun məsuliyyətini öz üzərinə götürmüşdür.