Accessibility links

Video

Samir İsayev: Prezidentin bəyanatında mesajları ilə bağlı real tədbirlər səslənmədi


Hüquqi Düşüncə İctimai Birliyinin sədri Samir İsayev Amerikanın Səsinə video müsahibəsində vətəndaş cəmiyyətinin Azərbaycanda siyasi proseslərə təsiri barədə danışıb. Müsahibədən seçmələri təqdim edirik: - “Bu il seçki ili olduğundan vətəndaş cəmiyyəti sektorunda fəallıq hiss olunur. Son dövrlər yaradılan siyasi hərəkatlarda siyasi partiyalardan fərqli olaraq ictimai təşkilatlar birləşir. Vətəndaş cəmiyyətləri artıq seçkilərlə bağlı təbliğat və təlimlərə başlayıb”; - “Azərbaycanın vətəndaş cəmiyyətləri ərəb inqilablarından qabaq islahatlarla bağlı hökumətə müraciət edib. Çox təəssüf ki, hökumət həmişə vətəndaş cəmiyyətlərinin təkliflərini qulaq ardına vurur. Müstəsna hallarda hansısa tövsiyəni qəbul edib”; - “Ərəb inqilablarının Azərbaycan hökumətinə elə bir təsiri olmadı. Vətəndaş cəmiyyətlərinin fəallığı artdısa da, hökumət dialoqa getmədi, qərarların qəbul edilməsində vətəndaş cəmiyyətlərinin iştirakçılığını təmin etmədi”; - “Prezident korrupsiyaya qarşı mübarizə barədə bəyanat versə də real nəticələri olmadı. Vətəndaş cəmiyyətləri ilə zor gücünə danışmağa üstünlük verildi”; - “İndiki anda vətəndaşların kortəbii şəkildə küçələrə çıxmaması üçün onların təşkilatlanması və maarifləndirilməsi lazımdır. Bu yükü öz çiyninə götürəcək qüvvə vətəndaş cəmiyyətləridir”; - “Vətəndaşlar artıq müxtəlif təşkilatlarda, hərəkatlarda birləşir. Bunun nə qədər uğurlu olacağıını gələcək göstərəcək. Vətəndaşlar öz seçki hüququ uğrunda nə dərəcədə mübarizə aparacaq, seçkilərdə nə dərəcədə fəal olacaq, iqtisadi və siyasi islahatlara nə dərəcədə nail olacaq? Bunu hazırki anda demək mümkün deyil”; - “Prezidentin dünənki çıxışı göstərdi ki, hökumət dialoqa doğru addım atmaq istəyir. Prezidentin bəyanatı vəzifəli şəxslərin qanunsuz hərəkətlərinin, vəzifəli şəxslərin və onların övladlarının qanun pozuntularının, harınlamalarının, biznesmenlərin haqqının tapdanmasının qarşısının alınması ilə bağlı mesajlar idi. Amma prezidentin bəyanatında bu mesajlarla bağlı real tədbirlər səslənmədi. Sadəcə səsləndirmək ki, mən belə adamlarla işləməyəcəm, bu ümumi sözlərdir. Bu ümumi sözləri prezidentimizin dilindən bir neçə dəfə eşitmişik”; - “Biz konkret addımlar gözləyirik. Gözləyirik ki, bu gün həmin bəyanatların həyata keçirilməsi üçün konkret sərəncamlar verilsin, tədbirlər planı elan edilsin, təmizləmələr başlansın”; - “Qubada, Binədə, İsmayıllıda baş verən hadisələr prezidenti dünənki bəyanatı verməyə məcbur etdi. Digər tərəfdən, Zaqatala və Balakəndə zəlzələdən zərər çəkən insanların etirazları dünən fövqəladə hallar naziri Kəmaləddin Heydərovun oraya səfər etməsinə, yerlərdə görüşlər keçirib problemləri öyrənməsinə səbəb oldu”; - “Digər tərəfdən QHT-lərə münasibəti sərtləşdirən qanun layihəsini müzakirəyə çıxarıblar. Bu onu göstərir ki, hökumət islahatlarla bağlı hərtərəfli proqrama malik deyil”: - “Prezidentin dünənki siyasi bəyanatından sonra real addım Quba, Binə və İsmayıllı hadisələri ilə bağlı həbs edilənlərə amnistiya elan edilməsi olardı. Əksinə, bu hadisələrə səbəb olan məmurlar istintaqa cəlb edilməlidir”.

XS
SM
MD
LG