İranda tanınmış rejissor və aktyor Hadi Hicazifərin 1980-1988-ci illərdə baş vermiş İran-İraq müharibəsi haqqında çəkdiyi türkdilli “Mehdinin Mövqeyi” filmi 40-cı Beynəlxalq Fəcr Festivalının qalibi olub.
Hadi Hicazifərin rejissor, ssenarist və baş rol aktyoru olduğu kinofilm İran-İraq müharibəsində öldürülən məşhur komandir və Urmiyənin sabiq Bələdiyyə Başqanı Mehdi Bakirinin həyatının son illərini təsvir edir.
“Mehdinin Mövqeyi” filminin əsas xarakteri Mehdi Bakiri Urmiyənin sabiq bələdiyyə başqanı və İran-İraq müharibəsində 31-ci Aşura diviziyasının komandiri olub. O, 1985-ci ilində 31 yaşında ikən müharibədə öldürülüb.
“Mehdinin Mövqeyi” İranın əsas illik film festivalı olan Fəcr Festivalında “ən yaxşı film”, “ən yaxşı ilk film”, “ən yaxşı səs yazısı”, “ən yaxşı musiqi” və “ən yaxşı xüsusi effektlər” üçün “Büllur Simurğ” mükafatını almağa nail olub.
“Mehdinin Mövqeyi” filmi əslən Qərbi Azərbaycan vilayətinin Xoy şəhərindən olan Hadi Hicazifərin rejissoru olduğu ilk uzunmetrajlı film, habelə onun ssenarist və baş rol oyunçusu olduğu ikinci türkdilli filmdir. Onun ssenarist və baş rol oyunçusu olduğu “Atabay” filmi iki il əvvəl 38-ci Fəcr Festivalında mübahisələrə yol açmışdı. Hicazifər filmin türkcə çəkilməsinə etiraz edən jurnalisti “faşist düşüncəli” adlandırmışdı.
Hazırda İranda böyük ekranlarda olan türkdilli “Atabay” filmi xüsusilə İran Azərbaycanında əldə etdiyi uğur sayəsində hazırkı dövrdə İranda ən çox satılan filmlər arasındadır.
Hicazifərin yeni filminin də türk dilində olması mübahisə mövzusu olub. O, “Mehdinin Mövqeyi” filminin mətbuat konfransında filmin türk dilində çəkilməsinin səbəblərini açıqlayıb.
Həqiqətən türkcə film çəkməkdə israrım yoxdur. Ancaq mən türkəm, sizinlə danışdığım zaman zehnim bu söhbəti türkcəyə çevirir və mən yenidən onu farscaya tərcümə edirəm.Hadi Hicazifər, rejissor
“Filmin türkcə çəkilməsi buna görədir ki, [İran-İraq müharibəsindəki] 31-ci Aşura Briqadası türklərin briqadasıdır. İçində sadəcə iki nəfər farsdilli olub. Filmdə olmazdı ki, farsca danışsınlar,” rejissor qeyd edib.
Hadi Hicazifər dövlət agentliyi İRNA-ya müsahibədə də filmin dili haqqında izahat verib. “Türk dili üzərində israrım yoxdur,” o, söyləyib. “Təəssüf ki, biz dil və mədniyyət müxtəlifliyinin gözəlliklərindən xəbərsizik. Hər şeyi memarlıqda olduğu kimi tək şəkil və tək formaya çevirməyə çalışırıq. Həqiqətən türkcə film çəkməkdə israrım yoxdur. Ancaq mən türkəm, sizinlə danışdığım zaman zehnim bu söhbəti türkcəyə çevirir və mən yenidən onu farscaya tərcümə edirəm”, o bildirib.
“Mehdinin Mövqeyi” filminin əsas xarakteri Mehdi Bakiri Urmiyənin sabiq bələdiyyə başqanı və İran-İraq müharibəsində 31-ci Aşura diviziyasının komandiri olub. O, 1985-ci ilin mart ayında 31 yaşında ikən müharibədə öldürülüb. Bakiri İran İslam Respublikasında İran-İraq müharibəsinin ən önəmli fiqurlarından biri hesab edilir. İran Azərbaycanı başda olmaqla ölkənin hər tərəfində onun xatirəsini əziz tutmaq üçün şəhərlərin bir çox əsas küçələri və ümumi məkanlarına “Şəhid Mehdi Bakiri” adı verilib.
