Accessibility links

Beynəlxalq Bankın kreditini qaytara bilməyən daha bir qrup şəxs həbs edilib


Beynəlxalq Bank

Beynəlxalq Bank

Azərbaycan Beynəlxalq Bankından yüksək məbləğdə kredit götürərək qaytarmayan daha bir qrup şəxs həbs edilib.

Bu barədə APA agentliyinə hüquq-mühafizə orqanlarından məlumat verilib.

Məlumatda deyilir ki, Azərbaycan Beynəlxalq Bankından yüksək məbləğdə kredit götürərək vəsaitləri qaytarmayan bankın sabiq məsul vəzifəli əməkdaşları və iş adamları - Beynəlxalq Bankın Mərkəzi filialının direktoru olmuş İlqar Abdullayev, Beynəlxalq Bankın Nəqliyyat filialının direktoru vəzifəsində işləmiş Kənan Orucov, Beynəlxalq Bankın inzibati binalarının mühafizəsini həyata keçirən “İnter Security” MMC-nin baş direktoru İbrahim Hüseynov, “Azərinşaatservis” MMC-nin Müşahidə Şurasının sədri Arif Həsənov, “Azərinşaatservis” MMC-nin təsisçisi olduğu “Trek İnvest” SC-nin direktor əvəzi Əli Əlişov və “İnter Glass” ASC-nin direktoru Fariz Muradov həbs olunublar.

Məlumata görə, Beynəlxalq Bankın vəsaitlərini mənimsəməkdə şübhəli bilinən şəxslərə qarşı da müvafiq tədbirlər görülməsi bundan sonra da davam etdiriləcək.

Xatırladaq ki, avqustun 21-də vəkil Kamandar Nəsibov Virtual.az saytına bildirib ki, Beynəlxalq Banka kredit borcunu qaytarmadığı üçün həbs edilən bütün 17 iş adamının həbs müddəti uzadılıb.

Nəsibovun sözlərinə görə, həbs edilən bütün biznesmenlər Daxili İşlər Nazirliyinin Mütəşəkkil Cinayətkarlığa Qarşı Mübarizə Baş İdarəsinin və Ədliyyə Nazirliyinin 1 saylı istintaq təcridxanalarında saxlanılırlar.

Yerli medianın yazdığına görə, iş adamları Beynəlxalq Banka olan yüz milyonlarla kredit öhdəliyini yerinə yetirə bilmir.

XS
SM
MD
LG