Accessibility links

Əfqan mediası Kabildə etiraz aksiyaları zamanı jurnalistlərin hücuma məruz qaldığını bildirir


Taliban Kabil və Əfqanıstanın digər bölgələrində etiraz aksiyalarını işıqlandıran bir neçə jurnalisti saxlayıb, onlara qarşı zorakılıq tətbiq edib. Jurnalistlər döyülüb, təhdid edilib və hətta bir neçə xəbər qruplarına çəkiliş üçün icazə almalarının lazım olduğu deyilib.

Əfqanıstanın Müstəqil Jurnalistlər Assosiayası (AIJA) bildirir ki, qadın hüquqlarının müdafiəsi ilə bağlı nümayişləri və Pakistana qarşı etirazları işıqlandırarkən bu həftə iki gün ərzində 14-dən çox müxbir və fotoqraf saxlanılıb.

Çərşənbə axşamı TOLOnews-un video operatoru Vahid Əhmədi də daxil olmaqla bir çox jurnalistlər saxlanılıb və BBC -nin xəbər qrupuna çəkilişləri dayandırmaq əmri verilib. Ertəsi gün isə yerli Etilaatroz qəzetinin iki əməkdaşı da daxil olmaqla Kabildə qadın haqları ilə bağlı mitinqi işıqlandıran jurnalistlər həbs olunub.

"Etilaatroz" qəzetinin baş redaktoru Zaki Daryabi iki müxbirinin şəkillərini sosial mediada paylaşaraq, onların zorakılığa məruz qalmasını nümayiş etdirib. O, qəzetin fotoqrafı Nemətullah Nəqdinin dediklərinə istinad edərək, bir Taliban üzvünün ayağı ilə onun üzünü yerə çırpdığını və başına təpiklər vurduğunu bildirib.

Bəlx vilayətinin paytaxtı Məzari-Şərifdə qadınların hüquqlarının müdafiəsi ilə bağlı nümayiş zamanı çəkilən videoda silahlı Talban üzvünün bir qrup insanı dayandırmağa çalışdığı görünür. Onların nümayiş zamanı kameralar daşıyan jurnalistlər olduğu güman edilir.

Amerikanın Səsi videonun həqiqiliyini müstəqil olaraq təsdiqləyə bilməyib.

Ötən ay Kabildə keçirdikləri ilk mətbuat konfransında Taliban "İslam prinsiplərinə" uyğun olaraq işlədikləri və ədalətli olduqları, eləcə də "milli maraqlara" xidmət etdikləri təqdirdə medianın xəbər verməkdə sərbəst olacağını bildirmişdi.

Reuters xəbər agentliyi adı açıqlanmayan bir Taliban rəsmisinə istinadən mediaya qarşı hücumlarla bağlı son məlumatların araşdırılacağı haqda xəbər verib.

AIJA və Beynəlxalq Jurnalistlər Federasiyası (IFJ) daxil olmaqla, bir çox media hüquqları qrupları jurnalistlərə qarşı bu rəftarı qınayıb.

IFJ -in bəyanatında deyilir ki, həbslər və zorakılıq "Taliban"-ın azad, müstəqil və özəl mətbuatla bağlı verdiyi yeni vədlərə tamamilə ziddir.

Amerikanın Səsinin Urdu xidmətinə danışan bəzi jurnalistlər, icazəsiz foto və videolar çəkdikləri üçün saxlanıldıqlarını bildirib.

TOLO TV-nin keçmiş aparıcısı Şakela İbrahamkel Amerikanın Səsinə bildirib ki, qrupun "vədlərinə sadiq qalacaqlarına inanmaq olmaz". O, 2016-cı ildə Taliban bombardmançısı tərəfindən bir neçə həmkarı öldürüldükdən sonra ölkədən qaçmağa məcbur olub.

Yerli jurnalistlər və insan haqları qrupları bildirir ki, Taliban hakimiyyəti ələ keçirdikdən sonra bəzi xəbər agentlikləri musiqidən istifadə etməmək və qadınların iştirak etməməsi üçün proqramlarında dəyişikliklər edib və bir neçə qadın jurnalist işini dayandırıb.

Şərhlərə bax

Amerika İcmalı

Amerika İcmalı - 24 Sentyabr 2021
please wait

No media source currently available

0:00 0:28:23 0:00
XS
SM
MD
LG