145 il əvvəl - 1875-ci il iyulun 22-də dövrünün maarifçilik hərəkatının görkəmli nümayəndələrindən olan Həsən bəy Zərdabi “Əkinçi” qəzetini nəşr etdirməklə Azərbaycan milli mətbuatının əsası qoyub. Əsasən maarifçilik missiyasını üzərinə götürmüş “Əkinçi” az müddətdə həm ziyalı təbəqə, həm də sadə insanlar arasında çox məşhurlaşdı. Təsadüfi deyil ki, dövrünün görkəmli ziyalıları və qələm sahibləri qəzetlə əməkdaşlıq edir, müntəzəm məqalələrlə çıxış edirdilər. Ayda iki dəfə olmaqla 300-400 arası tirajla nəşr edilən "Əkinçi"nin yalnız 56 sayı işıq üzü görüb. Sonrakı illərdə ziyalılar tərəfindən nəşr edilən “Şərqi-rus”, “Ziya”, “Kəşkül”, “İrşad”, “Molla Nəsrəddin” kimi qəzet və jurnallar “Əkinçi”nin ənənələrini davam etdirdi. 3 il əvvəl fəaliyyətə başlayan "Əkinçi" layihəsi də Zərdabi ideyalarının davamçısıdır. “Əkinçi” qəzetinin nəşrə başladığı 22 iyul tarixi isə 1991-ci ildən Azərbaycanda Milli Mətbuat günü kimi qeyd olunur.